Ina vita senza lungurella tranter sport e politica

Lai – Grenchen – San Murezzan – Lai. Il chalender da l’interprendidra, funcziunaria da sport e politicra Luana Bergamin (41) è quests dis stà bain emplenì. «Jau fatsch quasi sezza la Tour de Suisse», manegia la dunna oriunda da Zorten riend e gist da viadi cul tren a Grenchen en il chantun Soloturn.

L’expressiun «Tour de Suisse» ha Luana Bergamin natiralmain tschernì conscienziusamain. Ella è dapi mars la nova ed emprima presidenta da Swiss Cycling, la federaziun tetgala per il sport da ciclissem. Ed en questa funcziun apunta da viadi per ina sesida da suprastanza en la Bassa, dentant mo ina curta.

Dar bler e survegnir bler

Sia «Tour de Suisse» cumpiglia numnadamain gist tut ses engaschaments professiunals en ina. Sper diriger ils affars da Swiss Cycling – e durant il viadi da tren da si’atgna interpresa – spetgan per la deputada dal Cussegl grond che politisescha per Il Center anc dus dis sesida da fracziun a San Murezzan, quai en vista a la sessiun d’avust.

«Quest’emna è pelvaira en zichel extrema», admetta Luana Bergamin plinavant ed agiunscha ch’i saja da chattar in bun equiliber en la planisaziun e limitar talas emnas sin in minimum per «restar sauna en il chau ed er en il corp». Dond in sguard sin sia pagina d’internet, dat dentant en egl che l’anteriura skiunza da professiun è in dunna magari engaschada. «Tut mes engaschaments dattan er enavos blera energia. Ti das bler, dentant ti survegns enavos era bler. Fin entant che tut è en ina ­buna ballantscha, sun jau era vinavant motivada da m’engaschar.»

Onur e respect per il nov uffizi

Uschia per exempel apunta sco emprima presidenta insumma da Swiss Cycling. «Quai era in fitg bel mument per mai. Las elecziuns èn stadas intensivas», sa regorda Luana Bergamin che è anc oz adina onurada e plain respect per l’uffizi e sias incumbensas. Sco per exempel ­actualmain cun instradar ina nova strategia ubain sco cuntrapunct sportiv la pussaivladad da represchentar la federaziun durant l’emprima etappa da la Tour de France da las dunnas che ha gì lieu gist avant curt a Losanna. «Quai è il pli grond eveniment en la scena dal sport da ciclissem ed alura da pudair esser preschenta sco presidenta ed esser sin tribuna durant l’undrientscha da las victuras, quai dat puspè motivaziun per dossiers pli grevs.»

La Tour de France dimena – in highlight persunal per ella – è per la Svizra perfin in mument clav. «Per nus sco federaziun era la victoria da la quart’etappa da Marlen Reusser e la surdada dal tricot mellen in mument vairamain istoric», giuditgescha Luana Bergamin la prestaziun da la ciclista svizra. Era sch’i n’ha betg tanschì per ina plazza da podest en il classament general a la fin finala.

Fascinaziun: Sport

Grondas emoziuns tar il sport, insatge ch’accumpogna a Luana Bergamin tras tut sia vita professiunala, quai sco organisatura e cussegliadra per eveniments da sport gronds e ­pitschens: sco per exempel tar ils campiunadis mundials da biatlon e las cursas da la cuppa mundiala da skis a Lai ubain sco responsabla per ils voluntaris durant ils campiunadis mundials da hockey quest onn en Svizra e proxim onn in Germania. «Quai era pelvair in spectacul. Cunzunt da vesair a tut quels fans a Turitg ed a Friburg», suttastritga Luana Bergamin s’allegrond gia per campiunadis almain uschia euforics proxim onn en Germania. Empermettent, en ils egls da Luana Bergamin, alura segir il gieu d’avertura Germania encunter la Svizra davant dapli che 60 000 fans en il stadion a Schalke.

Sper tut quests gronds eveniments da sport batta il cor da Luana Bergamin dentant era per il parasport e sport dad inclusiun. En il passà è ella stada tranter auter manadra da sport d’elita tar PlusSport, la federaziun da sport per persunas cun impediments. En il fratemp – e senza ina funcziun uffiziala – promova ella ils interess dal parasport e l’inclusiun sin autras vias, sco per exempel en sia lavur sco politicra.

Fascinaziun: Politica

Ina chaussa haja simplamain manà tar l’autra ed uschia saja il pass en la politica stà in pass evident. Oravant tut la mancanza da dunnas en posiziuns centralas e la constataziun, che la promoziun da sport na funcziunia betg senza la politica, sajan stads ils motivs decisivs da vegnir activa en la politica.

Ed en quella vuless la deputada dal circul d’Alvaschagn dar ina vusch er ils proxims quatter onns a las dunnas ed a la tematica da l’inclusiun. En general – dentant cunzunt en il sport – concluda Luana Bergamin il discurs, cuntinuond plain schlantsch sco interprendidra, funcziunaria da sport e politicra sia «Tour de Suisse» vers Grenchen, a San Murezzan ed enavos a Lai.