«L’equipa ha in bien potenzial»

Cun ina prestaziun fetg constanta ha l’emprema equipa dall’Uniun sportiva Schluein Glion gudignau il campiunadi da ballapei dalla gruppa 1 dalla 3. ligia la stagiun vargada. El quen final ha la squadra dalla Foppa giu buca meins che otg puncts avantatg sil secund dalla tabella Mels. Dils 22 giugs da campiunadi ha Schluein Glion spiars sulettamein dus ed en in contonschiu in remis. 19 giugs ein vegni gudignai. Negin’autra equipa dallas quater gruppas dalla 3. ligia dalla Svizra orientala ha recaltgau tons puncts sco Schluein Glion. La pagaglia persuenter ei la promoziun ella 2. ligia regiunala stada. «Suenter 2013 e 2019 eis ei la tiarza ga che nus mein si ella 2. ligia regiunala», di il schef dil sport dall’uniun, Urs Casutt.

Partenza encunter Buchs

La partenza el campiunadi dalla 2. ligia regiunala 2026/27 fa Schluein Glion encunter Buchs. Il giug ei dumengia, ils 16 d’uost 2026 allas 16.00 a Crap Gries. Buchs ha mussau ina prestaziun constanta la stagiun vargada alla 2. ligia regiunala. La squadra songagliesa ha terminau quel cun 34 puncts sil 9avel rang dallas 14 squadras. «Nus havein giu bunas preparativas las davosas sis jamnas ed essan semtgai pil giug encunter Buchs. Nus enconuschin buca quella squadra e perquei eis ei grev da far ina prognosa», di Urs Casutt. Sch’el miri silla tabella dalla 2. ligia regiunala digl onn vargau seigi el dil meini che quei seigi in adversari egual: «Vid quei adversari savein nus segiramein semesirar. Igl ei in impurtont giug per l’entschatta dil campiunadi. Saver recaltgar gia spert ils emprems punts el campiunadi fuss impurtont. Quei prendess empau squetsch e dess ruaus all’equipa.»

In giug pli spert

Dalla squadra che ha dau la davosa ga ella 2. ligia regiunala ein mo paucs pli activs tier Schluein Glion. «Quei ein aunc dus ni treis. Pils biars auters ei quella ligia in novum», constatescha Urs Casutt. La differenza denter la 3. e la 2. ligia regiunala descriva el suandontamein: «Igl ei in ballapei pli spert. Las equipas laian denton era dar ballapei. Il giug ei cumbinaus cun dapli tactica, mintga squadra ha siu plan. Damai ch’igl ein treis arbiters sil plaz eis ei era pusseivel da dar cun dapli resca pertuccont offside.» Las preparativas da Schluein Glion per quella sfida seigien stadas bunas: «Nus essan leds ch’ei entscheiva ussa.» Ils giugs preparativs seigien stai buns, era sch’ei seigi malsegir da quantificar quels. La finamira dalla stagiun seigi da contonscher in rang denter il 7avel e 9avel per la fin dalla stagiun. «Ell’emprema fasa dil campiunadi ha ei num s’integrar ella ligia. L’equipa ha in bien potenzial. Ell’offensiva havein nus buna qualitad ed ella defensiva stuein nus mirar d’esser stabils», di Urs Casutt che lai sentir siu optimissem per la stagiun vegnenta.

Entgins novs

La fin dalla stagiun passada han Tiziano e Flurin Capaul terminau lur carrieras da ballapei ell’emprema equipa da Schluein Glion. Da niev el cader per la stagiun vegnenta ein David Flurin Cabernard, Lorenzo Nolvo, Sean Joos, Francesco Trestano e Josa Capeder. Sco gia la primavera vargada vegn Gianluca Casutt probabel era buc a star a disposiziun alla squadra quest atun pervia d’ina blessura ch’el ei vid curar ora. Urs Casutt spera che la blessura dil goli Mattia Büchler el davos giug da preparaziun seigi buca memia nauscha. Il team da trenaders cun Mirco Zala alla testa resta il medem sco la stagiun vargada.