Fontanivas crescha cun pastg artificial e stialas da badugn

Ina culissa pli adattada havess il niev plaz da ballapei artificial strusch saviu porscher venderdis sera. Ferton che tschien hosps ein seradunai sut ina tenda umbrivauna, trenavan dasperas ver curonta juniors dalla regiun sil plaz. Gest quei ei vegniu puntuau pliras gadas all’inauguraziun dil niev pastget artificial a Glion – ch’el seigi in’investiziun pil futur, per la giuventetgna e per la regiun, pia exact ­pils affons sil plaz. Tut ils oraturs digl act festiv han menziunau quei: il president communal dad Ilanz/Glion Marcus Beer, il president da la Uniun sportiva ­Schluein Glion (USSI) Thomas Müller e schizun il cusseglier guvernativ Marcus Caduff. Schegie ch’il parsura dil Departament per economia publica e fatgs socials ha tradiu venderdis ch’el seigi – en cumparegliaziun culs juniors – atgnamein la fallida persuna per inaugurar in plaz da ballapei: «Jeu sun mai staus enorm talentaus sco giugadur!»

Cun stialas da badugn

Il niev plaz da ballapei artificial a Fontanivas – che senumna ussa Menzli Sport Campus tenor la «madretscha», ina stizun da sport locala – stat atgnamein a disposiziun gia dapi varga in meins ­all’USSI. L’inauguraziun ufficiala ei denton stada la sera avon Nossadunna d’uost. Cun plaids festivs, apéro riche e cun in ­turnier da «legendas», vul dir dad anteriurs giugadurs dall’entira Surselva. Gest quels rutiniers han saviu testar l’ingredienza la pli speciala dil niev pastget. Quel ei numnadamein emplenius denter ils fustitgs da plastic cun granulat da badugn. Las stialas finas laian ruschnar ballas, giugadurs e giugaduras bunamein sco sin in pastget natural.

Dil granulat natural ein ils meinaproject dil campus specialmein loschs, damai ch’ei setracta d’in novum svizzer, sco quei che Gian Arpagaus da Falera e Jenins ha declarau sin damonda. El ha menau per la USSI igl entir project a Fontanivas ed ha detg: «Perquei ch’ins vul ed astga buca pli duvrar in granulat da plastic, essan nus i alla tscherca d’alternativas: granulat da cucun, badugn ni schizun da terc.» Che la fin hagi il badugn fatg la cuorsa: «En Scandinavia ha quel fatg buns tests, gest cun temperaturas pli freidas sur unviern. En Svizra essan nus denton ils emprems cun talas stialas da badugn.»

Il puzzle da Fontanivas

Il plaz da ballapei artificial ei in ulteriur pass el svilup digl areal Fontanivas dils davos onns. Cun plascher ha Marcus Beer, il president communal dad Ilanz/Glion, rendiu attent als differents tocs da puzzle el contuorn: «Sper il bogn aviert ed ils plazs da tennis havein nus realisau ils davos onns aunc in pumptrack ed in skatepark. Ussa havein nus il niev plaz da ballapei. Fontanivas duei esser in liug plein veta per grond e pign.»

Tenor il president dall’USSI eis ei stau la vischnaunca che ha dau quella ga il stausch per realisar il project. En siu ­plaid festiv ha Thomas Müller numnadamein dau in sguard anavos. Ei hagi bein dau gia naven dils onns 2000 ideas per realisar sin igl anteriur plaz dil FC Ilanz in camp da trenament cun pastget ­artificial. Pér 2023 hagi lu la vischnaunca dau igl impuls decisiv e tut seigi vegniu concretisau. «Ed ussa sun jeu incantaus con bials ch’il plaz ei vegnius», ha Thomas Müller detg.

«Sgartau ensemen il rest»

Igl entir project dil plaz da ballapei ha custau 1,7 milliuns francs. La USSI ha survegniu il sulom communal en dretg da baghegiar. La vischnaunca dad Ilanz/Glion ha concediu in credit ed ina garanzia da deficit egl import da 700 000 ­francs. Las instanzas cantunalas han contribuiu aunc ina gada 300 000 francs, damai ch’il plaz duei survir all’entira regiun per trenaments. Aschia ch’il club sez ha aunc stuiu «sgartar ensemen il rest», sco Thomas Müller ha detg cun in surrir. Quei ha la USSI fatg cun atgnas lavurs dils commembers (200 000 francs), cun prender daners ord las reservas, cun in emprest da diesch onns dalla vischnaunca e cun ulteriurs sustegns da sponsurs e vischnauncas.

Denter auter ha era l’equipa da dunnas dil Grasshopper Club da Turitg contribuiu 10 000 francs. Quei ha funcziunau sin intermediaziun digl impressari Theo Schaub da Turitg ch’ei bein enconuschents en Surselva e che ha colligia­ziuns cun GC. Ina dallas menadras da gestiun dil club da dunnas, Lauryn ­Reuber, ei era stada presenta venderdis a ­Glion. E tenor Thomas Müller hagien ella e Theo Schaub gia discutau davart la pusseivladad d’organisar in camp da trenament ella regiun.

Senza gardarobas e tualettas

Il niev Menzli Sport Campus ha bein ­dalla vart viers vest ina pintga tribuna. El porscha denton aunc buca gardarobas e tualettas. Da quellas ston las equipas far diever el bogn aviert Fontanivas dasperas. Dad era aunc construir ina infrastructura sanitaria sper il plaz havess surpassau la forza finanziala da club e ­vischnaunca. Tut spera denton ch’ins sappi realisar tals locals en in proxim pass.

Gest la munconza da tualettas ei era semussada bein en connex cul turnier cun quater equipas da «legendas» ch’ha giu liug suenter igl act ufficial. Denter ils giugs da mesura han era quels giugadurs cun gronda experientscha stuiu far lur duer muort l’agitaziun. Ins suppona perquei ch’igl èr da terc sper il Menzli Sport Campus vegni a far uonn buna ­raccolta.

Igl agronom e cusseglier guvernativ Marcus Caduff ha denton buca fatg allusiun en siu plaid a quella raccolta, cu el ha detg ch’il niev campus seigi dapli che mo in plaz da ballapei. El ha manegiau ch’il plaz seigi senza dubi era in impurtont liug da sentupada per la cuminonza ella regiun. Tenor las empremas experientschas vegn il plaz numnadamein ad esser bein frequentaus, sco quei che ­Thomas Müller ha tradiu: «Gia ussa ei il campus occupaus cumpleinamein, surtut cun equipas da juniors.»

Tiels anteriurs ei il turnier da legendas dil reminent ius a finir cun ina victoria dils seniors dall’USSI. Sco regurdientscha alla inauguraziun ha segir mintgin dad els purtau a casa singulas stialas da badugn els calzers.