Nov onn da scola cun cifras stabilas
La gronda part da las scolas popularas dal Grischun ha cumenzà glindesdi l’onn da scola 2026/27. L’Uffizi chantunal per la scola populara ed il sport ha dà part las cifras actualas dal dumber da scolaras e scolars, da l’occupaziun da las plazzas da persunas d’instrucziun e da las permissiuns da dar scola concedidas.
A Cuira en la chasa da scola Barblan han glindesdi il cusseglier guvernativ e manader dal Departament d’educaziun, cultura e protecziun da l’ambient dal Grischun (DECA) Jon Domenic Parolini e Chantal Marti-Müller che maina l’Uffizi da scola populara ed il sport assistì las emprimas lecziuns dal nov onn da scola. En quell’occasiun han els exprimì a tut las scolas en Grischun lur meglier giavischs per quest onn da scola. Il DECA ha tramess glindesdi ina communicaziun cun las infurmaziuns actualas davart las scolas grischunas.
Cifras stabilas
L’onn da scola passà 2025/26 ha la scola populara grischuna gì var 19 300 scolaras e scolars. Da quels han 18 968 frequentà la scola regulara (incl. scolaziun speziala integrativa) e 331 ina instituziun da la scolaziun speziala. Ina classa da la scola regulara aveva l’onn passà en media 15 scolaras e scolars. In pau dapli che 2400 magistras e magisters han instruì en il sectur da la scola regulara. Guardà sur tut ils stgalims è il grad d’occupaziun stà en media 68 %. Che questas cifras sajan pli u main identicas cun quellas da l’onn precedent, èsi inditgà en l’infurmaziun dal departament.
Pudì occupar las plazzas
Il cumenzament da fanadur 2026 n’eran quatter plazzas betg occupadas per il nov onn da scola 2026/27. Quai correspunda a stgars duas plazzas a temp cumplain. Per l’onn da scola 2026/27 èn vegnidas emessas fin ussa 522 permissiuns da dar scola en il sectur da la scola regulara. Avant in onn eran quai 467 permissiuns da dar scola. Questas indicaziuns mussan mintgamai la situaziun al cumenzament da fanadur. «Quantas permissiuns da dar scola ch’èn vegnidas emessas tut en tut per in onn da scola po mintgamai vegnir eruì pir pli tard», declera il DECA en sia communicaziun. Per l’onn da scola 2025/26 èn vegnidas emessas tut en tut 622 permissiuns da dar scola. Il pensum da lavur d’ina persuna d’instrucziun cun ina permissiun da dar scola en l’actual onn da scola è en media circa tar 44 %. Circa in quart da questas persunas d’instrucziun instruescha cun in pensum dad ina fin tschintg lecziuns. Mo 15 % instrueschan cun in pensum dad 80 fin 100 %.
Gust da leger dapli?