Partenza reussida – mo la sfida resta

La primavera 2025 ha il Team Surselva dallas dunnas gudignau il campiunadi da ballapei dalla gruppa 1 dalla 4. ligia. Aschia ei la promoziun ella 3. ligia reussida ed en quella ligia ei la squadra sesentida immediat fetg bein. La stagiun 2025/26 ha ella terminau sil tierz plaz.

Promoziun surprendenta

«In di suenter il davos giug dalla primavera vargada encunter Staad havein nus survegniu la damonda dall’Associaziun da ballapei dalla Svizra orientala schebein nus lessien ascender ella 2. ligia. Suenter ina seduta dallas responsablas e dils responsabels aunc quei di havein nus dau suatientscha alla promoziun ella 2. ligia e las giugaduras han beneventau quella decisiun», seregorda la trenadra Bea Caduff-Seiler. Il motiv ch’il Team Surselva ha sco tierz ella tabella finala saviu ascender dalla 3. ella 2. ligia ei stada ina restructuraziun tier l’Associaziun da ballapei dalla Svizra orientala.

Emprem giug – emprema victoria

La dumengia ei l’equipa sursilvana allura serendida a Cuera agl emprem giug en quella ligia nova e ha gudignau 2:1. «Nossa finamira ei adina da gudignar. Quei havein nus era vuliu encunter Cuera 97. L’equipa ha mussau ina buna prestaziun», di Bea Caduff-Seiler. Aschia sappi il campiunadi cuntinuar. Dumengia suonda il secund giug. Il Team Surselva retscheiva Uznach a Tavanasa allas 16.00. Uznach ha terminau il campiunadi dalla 2. ligia la stagiun vargada ella secunda mesadad dalla tabella. «Nus enconuschin buca quell’equipa, vegnin denton a sepreparar per quei giug sco pils auters: Nus sefocussein buca sigl adversari, mobein sin quei che nus lein e savein», di la trenadra. 

Bunas preparativas

Silla damonda, co las preparativas dall’equipa pil campiunadi niev seigien stadas questa stad sto Bea Caduff-Seiler buca ponderar ditg: «Fetg bunas. Las giugaduras ein vegnidas stediamein als trenaments ed ein stadas fetg motivadas. Nus havein trenau fetg intensiv, dend peisa all’atletica mo era agl exercezi da situaziuns da standard e sin sittar era ord distanza. En quels trenaments ha l’equipa segiramein fatg in pass anavon.» Cun excepziun d’entginas paucas giugaduras ei la gronda part dall’equipa ensemen aschia gia dapi tschun onns. Mintgina sa tgei che l’autra sa: «Per quei motiv havein nus era decidiu d’ir si ella 2. ligia.» Duas giugaduras dall’equipa digl onn vargau han calau cul ballapei. Il cader dumbra 21 giugaduras, leutier stattan junioras dalla categoria FF17 a disposiziun: «Treis junioras ein vegnidas cun nus la dumengia a Cuera e han era saviu dar il giug per part. Nus lein integrar successivamein las junioras ella squadra», sincerescha la trenadra che vegn sustenida els trenaments da Reto Caduff ed Edwin Cathomas. Leutier vegn il sustegn dalla fisioterapeuta ­Xenia Dietrich.

La sfida resta

La stagiun che ha gest entschiet culla victoria ordeifer encunter Cuera 97 vul il Team Surselva dallas dunnas terminar sin in rang el miez dalla tabella. «Quella rangaziun ei segiramein realistica. Mintga plaz che nus essan la fin finala pli anavon prendin nus era», di Bea Caduff-Seiler, mo manegia era: «Encunter las meglieras equipas da quella gruppa vegnin nus segiramein a stuer sbatter. Sche nus sepresentein sco equipa, vegnin nus da far era encunter quellas equipas ina buna pareta.» Quei optimissem vegn dalla trenadra era ella situaziun dil mument cun pliras giugaduras blessadas: «Sper Valentina Albin e Mara Blumenthal havein uss omisduas golias ch’ein blessadas il mument. El giug encunter Cuera 97 ha la golia Laura Casanova rut dus dets e croda ora entginas jamnas. Ella ei atgnamein attaccadra, mo ei sepurschida sco golia, damai che Martina Beeli maunca gia dapi il mars muort blessuras. Ussa stuein nus mirar co nus savein sligiar quei problem.»