«Cuira sco chapitala d’in chantun triling avess ina rolla da model»
L’Uniun Rumantscha Cuira promova la cuminanza e lingua rumantscha en la chapitala grischuna. Ella s’engascha ferm per ina purschida rumantscha en scola, da la scolina fin il stgalim superiur. Il president da l’uniun Patric Collet è tut auter che cuntent cun las mesiras da spargn da la citad da Cuira che pertutgan la scola bilingua.
Tge schais Vus sco president da l’Uniun Rumantscha Cuira davart las mesiras da spargn?
Patric Collet: Per nus sco uniun e geniturs pertutgads è quella mesira da spargn in proxim pass per indeblir la purschida e la promoziun rumantscha. Cuira sco chapitala d’in chantun triling avess atgnamain ina rolla da model da promover las linguas minoritaras dal Grischun, vul dir il rumantsch e talian.
Tge consequenzas avessi, sch’il rumantsch vegniss stritgà sin il stgalim superiur?
Actualmain porscha la scola da la citad da Cuira sin stgalim superiur ina classa rumantscha en la scola Quader. Là vegn instruì il rom art figurativ per rumantsch ed ils giuvenils e las giuvenilas han la pussaivladad da sa barattar per rumantsch. Per quella pitschna purschida ha nossa uniun stuì cumbatter ditg. Sche la citad stritga ussa quella, croda ina purschida rumantscha senza interrupziuns da la scolina fin l’universitad davent.
Han las mesiras da spargn anc auters effects?
Ina consequenza da quellas mesiras è era ch’i resta tar la purschida existenta e che quella na vegn en il futur betg schlargiada. Avant dus onns ha la scola da Cuira stritgà ina gruppa da duas scolinas bilinguas, uschia ch’ella porscha be anc ina gruppa, nua ch’i vegn instruì sursilvan. Quai è natiralmain in dischavantatg per ils uffants da tschels idioms. E da l’auter maun è quella purschida restrenschida sin 20 uffants. Sche la dumonda – e quella è pli gronda che la purschida – surpassa quel dumber, datti ina contingentaziun dal rumantsch. Lura èsi d’eruir: Tgi dastga visitar la scolina rumantscha e tgi betg?
Tge schliaziun dessi tenor Vus per la purschida bilingua a Cuira?
Forsa stuess il Chantun sustegnair las scolas bilinguas. Perquai, sche betg en scola – sper las medias –, nua vegn il rumantsch anc promovì?! Ma quai è ina dumonda politica.
Gust da leger dapli?