Novas ideas en Tenigia

Els zulers dil hotel vegl Bogn Tenigia eis ei stgir, ils tschabergals mauncan per part. E tscheu e leu dat in animal u animalet in sun. Vivan atgnamein spérts en cheu? «Forsa schon, jeu sun buca segirs, denteren eis ei schon empau misterius», di Sven Patrick Stecher, in dils co-possessurs, duront la tura tras ils baghetgs. Ils stabiliments dil Bogn Tenigia secumponan da dus tracts dils onns 1970, la veglia casa da cura dil 1908 ed in chalet, la casa da miedi.

Sclariu il possess

Misteriusa ei era la historia davart ils possessurs dils baghetgs, ed ella meina ella vischnaunca turitgesa dad Eglisau. Da leu ein numnadamein ils treis protagonists che han giu dispeta. In dad els ei Rolf Diefenbacher. El haveva il 2023 annunziau da ver cumprau il hotel. E da tschella ei il duo Anton (Tony) Meier e Sven Patrick Stecher, ch’ein quest onn sepresentai sco possessurs. «Quei cass ei per nus ussa sclarius», declara Sven Patrick Stecher. «Toni Meyer ei adina staus quel che ha finanziau tut ils plans da Rolf Diefenbacher, mo quei capetel ei ussa a fin. Naven dad ussa essan el ed jeu al tgamun dalla societad.» Quei fatg conferma era Rolf Diefenbacher sin damonda. Duront che Sven Patrick Stecher ei sco giurist e cussegliader d’interpresas in um per damondas administrativas ed ideas, ei Tony Meyer (73) che ha ina fatschenta da baghegiar il finanziader.

Airbnb e campadi

Plans e visiuns ha ei el decuors dils onns schon dau ina massa per las localitads dil hotel che han inaga purschiu plazza a 200 tochen 300 persunas e che ha fatg concuors els onns 1970. Il duo Meyer-Stecher ha denton era schon pigliau a mauns enqual caussa, ofniescha il giurist: «Ell’anteriura casa dil miedi pon ins gia ussa affittar combras via la plattafuorma Airbnb.» Ed era en il campadi che il duo ha realisau ella cuort dil hotel san persunas schon parcar lur «campers» per star sur notg cun ina reservaziun online. «In pèr paucas persunas han era schon fatg diever da quella purschida, ed els ein naturalmein stai fascinai da quels baghetgs vegls cheu.»

Sco il moviment d’ina spirala

Dabia autras ideas ein aunc sin rucca. Aschia dueigien per exempel era entginas combras dil hotel dils onns 1970 vegnir renovadas aschia ch’ins sa star sur notg. «L’idea ei da revitalisar plaun e plat il Bogn Tenigia», declara Sven Patrick Stecher: «Nus vein empau in’autra filosofia ch’ins savess forsa spitgar. Pass per pass realisein nus projects. Ins sto visualisar quei sco il moviment d’ina spirala che piarda mai sia forza e vegn cun dapli moviment adina pli stabila e sperta.» Davart las finanzas resta el reservaus, «mo igl ei segiramein buca l’idea dad investir ina summa da plirs milliuns francs».

Tschaffar la fontauna d’aua minerala che s’auda tier il bogn ei in’ulteriura idea, che era schon igl anteriur possessur Ernst-Ludwig Schulz (mira boxa) vuleva realisar. «Quei fuss naturalmein sensaziunal, sche nus savessen duvrar l’aua», fa il giurist a saver. Daventar in liug da pelegrinadi sco alternativa tier la via s. Giachen: «Quei fuss bein il liug ideal cheu cun tontas capluttas ella regiun.» Duvrar ils baghetgs sco gallaria d’art, installar panels solars, ina tratga da pèschs ed aschia vinavon: Sven Patrick Stecher ei fiug e flomma, cu el discuora da quellas massa pusseivladads cheu.

In «escape room» ord il bogn vegl

Era pil baghetg vegl ha el schon in plan. «Jeu vuless realisar en leu in ‹escape room›, il pli stravagant dil mund», declara el. «Escape rooms» ein ina fuorma da divertiment, ch’ei vegnida en moda ils davos onns. Ils participonts e las participontas vegnan serradas en en ina stanza e ston lura anflar ina via anora enten sligiar problems u cun anflar in scazi.

Per la vischnaunca Sumvitg ei mintga idea beinvesida, di il president communal Patrick Schaniel. «Quei ei ina buna caussa. Nus sustenin naturalmein ils promoturs dil Bogn Tenigia enteifer nossas directivas legalas. Nus sperein era ch’ei vegnien da far guotas cun tgau e ch’ei vegnien da realisar lur projects.»

Tgei ch’ei clar schon ussa: Enqual guota cun tgau sto aunc vegnir enguttada, per che il bogn resvegli ord sia sien da rosa spina. E forsa drova ei era aunc empau agid dils «spérts» dil bogn.