Seguond inscunter da chaunt a Zuoz

Dals 25 als 27 settember 2026 ho lö il seguond inscunter da chaunt a Zuoz. Scu cha’ls organisatuors scrivan in üna comunicaziun a las medias, vöglian els cun quist format dad üna fin d’eivna metter a disposiziun diversas pussibilteds per gnir in contact cun chaunt e musica. Experienzas chi vegnan fattas cun chanter svess ubain eir be cun tadler vegnan partidas cun otras persunas chi haun la listessa paschiun u eir cun specialistas e specialists illa tematica. «L’ideja es cha glieud da cò e da lo, chantaduras e chantaduors da cor, dirigentas e dirigents, giasts ed amatuors s’inscuntran per survgnir nouvs impuls per la lavur cul chaunt», declera l’organisatur Curdin Lansel. Il termin pel simposi es consciaintamaing tschernieu per la fin da settember, la glieud po uscheja s’allegrer per cumanzer d’utuon il nouv an da chaunt.

Arrandschamaint culturel-turistic

La fin d’eivna as drizza a giasts ed indigens, minchün es bainvis a l’Inscunter da chaunt a Zuoz. «Eau nu sun ün amih da separer gruppaziuns da glieud, eau sun da l’ideja cha nus stöglian involver a tuots. Nus indigens survgnins bgers impuls d’artists d’utrò, giasts survegnan bunas idejas da nus Engiadinais, vegls profitan da giuvens e viceversa», disch Curdin Lansel. Tenor el es ün turissem chi tratta tematicas culturelas interessant ed important: «Uschè paun tuots be profiter ün da l’oter», agiundscha’l.

Trais elemaints principels

Trais elemaints principels sun suot ün tet. Il fil cotschen da quist an es «Musica e lingua». Tuot las activiteds da l’inscunter haun quist minz cumünaivel. Ün elemaint suot quist tet sun ils concerts, concerts da differentas furmaziuns, dal chantautur Curdin Nicolay sur The Sam Singers fin a l’Ensemble vocal Consonus. Il seguond elemaint es il lavuratori da la sanda cul cor ad hoc. Las chantaduras e’ls chantaduors chi s’annunzchan già uossa per chanter in quist cor paun fer experienzas inschmanchablas cul dirigent Johannes Knecht. Il terz elemaint dal format sun las discussiuns, ils barats, il referat da Manfred Koch chi quinta da silbas chi chauntan e tuns chi quintan. A’s s’inscuntra dimena per fer musica e per discuter davart la musica. Partecipantas e partecipants s’annunzchan già uossa per fer part ad instrucziun da chaunt u furmaziun da vusch, sulet ubain in üna gruppetta. Las chantaduras Clara Sattler e Sara-Bigna Janett e’l chantadur da Puntina, Albert Frey, daun lecziuns da chaunt.

Musica e lingua

«Nus tuots cugnuschains la situaziun: Chanzuns da Chalandamarz, chanzuns da Nadel, chanzuns d’iffaunts vegnan chantedas adüna darcho, as so las melodias e’ls vers sü per la daunta, ma chi so dir che ch’ella u el chaunta propi?», as dumanda l’organisatur Curdin Lansel. Chi so propi declarer il cuntgnieu da las chanzuns da Chalandamarz u da Nadel? Chi inclegia mincha pled chi vain chanto? Quaunt inavaunt stu però il chantadur u la chantadura resp. il dirigent u la dirigenta savair insomma che ch’el u ella chaunta? Che scopo ho il text in üna chanzun, schi nu’s l’inclegia inamöd na? U ho il text forsa istess üna lezcha illa cumposiziun? Che füss alura la relaziun traunter il pled e la melodia? «Tuot quistas dumandas occupan adüna darcho a glieud chi fo musica, causa que es la tematica zuond interessanta», declera Curdin Lansel.

Annunzcher per duos activiteds

Per fer part a las differentas occurrenzas fo que dabsögn da s’annunzcher be per duos activiteds, tuot il rest es aviert per minchün e minchüna sainz’annunzcha. Per chanter però aint il cor ad hoc da la sanda e per piglier instrucziun da chaunt sulet u in gruppa es l’annunzcha indispensabla. «Nus fains ün plaun d’ingaschamaint cun urari», declera l’organisatur. Il credo dals organisatuors es dal rest: Furmaziun da musica gratuita per minchün, que dess esser ün dret d’umaun. Cha que saja però pussibel be causa ils sponsuors ourdvart generus.