Tragedia a Tusaun: Quatter persunas moran tar in incendi

Ina chasa a l’ur dal vitg da Tusaun. En il plaunterren in restaurant ed en las trais auzadas survart pitschens studios affittads. Surtut persunas singulas da differentas naziuns abitavan là. Quai ha ina pledadra da la Polizia chantunala dal Grischun explitgà venderdi a l’agentura Keystone-SDA. Il venderdi, curt suenter mesanotg, è tenor emprimas enconuschientschas rut ora in fieu en la segunda auzada da quella chasa.

Otg persunas blessadas

14 persunas han pudì sa salvar or da las flommas. Da quellas èn otg sa blessadas, duas perfin grevamain. Ellas èn vegnidas transportadas en ils ospitals a Cuira, Tusaun, Glion e Turitg. Per las ulteriuras persunas salvadas ha la vischnanca da Tusaun mess a disposiziun alloschis.

Stgars 100 forzas d’intervenziun han lavurà tras la notg sin venderdi. Ma las tschintg persunas sparidas han fatschentà il pli fitg anc en il decurs da la fin d’emna. Lur confamigliars spetgavan al lieu sin novas. Numerus aspectaturs e blera glieud da las medias eran al lieu da la disgrazia.

Perquai che la stgala tras il chasament era sballunada tar l’incendi, han las forzas d’intervenziun demontà il tetg stresa per stresa per ch’ils investigaturs possian ir en la chasa e tschertgar fastizs.

Chattà quatter baras

La sonda han las forzas d’intervenziun lura chattà duas baras en la chasa. Lur identificaziun è tenor indicaziuns da la polizia per il mument anc pendenta. Gia il venderdi aveva la pledadra da la polizia declerà envers Keystone-SDA: Sche restanzas umanas vegnissan chattadas, stuessan l’emprim vegnir prendidas provas da DNA e silsuenter vegnir cumparegliadas. Las investigaziuns pudessan pia anc sa trair a la lunga.

Il bajetg ars è era la sonda anc stà en privel da sballunar, hai gì num en ina communicaziun da la polizia. Quai ha engrevgià las lavurs d’investigaziun e salvament. Las equipas da salvament hajan be pudì penetrar per part en la chasa.

La dumengia ha la Polizia chantunala dal Grischun lura communitgà che las lavurs d’investigaziun en il bajetg hajan pudì vegnir fatgas pli spert che supponì en l’emprim mument. Da las oriundamain tschintg persunas annunziadas sco sparidas haja ina persuna gia pudì vegnir localisada pli baud, ha scrit la polizia. Malgrà la structura dal bajetg ch’è per part sbuvada, han ins pudì tschertgar en l’entir object durant la fin d’emna las persunas sparidas. Era las duas persunas ch’eran fin l’ultim anc sparidas èn vegnidas chattadas mortas. L’identificaziun da las baras n’è però anc betg terminada.

Aua da stizzar en flum

Era represchentants da l’Uffizi chantunal per la natira e l’ambient ed in survegliader da pestga èn vegnids sin il lieu da l’incendi. Il bajetg pertutgà è numnadamain datiers d’in flum. L’aua da stizzar è tenor la pledadra da la Polizia chantunala dal Grischun arrivada en quel. Ils represchentants da las autoritads hajan fatg in’analisa da la situaziun e vegnian anc ina giada a far mesiraziuns pli tard.

Gia avant diesch onns avevi brischà en quest quartier. Era lura era stà pertutgà il bajetg ch’è ussa brischà ora, dentant be en la part davos. Cuntrari a questa giada n’eran quella giada però betg vegnidas blessadas persunas. Quai ha accentuà la pledadra.

Tge ch’è stada la raschun da l’incendi n’è era la dumengia betg anc cler. In connex cun ils urizis la notg avant para però pauc probabel. La procura publica dal Grischun e la Polizia chantunala dal Grischun erueschan vinavant la raschun e las circumstanzas da l’incident.

La Regenza condolescha

En ina communicaziun da medias da dumengia suentermezdi ha era Martin Bühler exprimì en num da la regenza grischuna sia consternaziun e tristezza en vista a questa tragedia. Il president da la Regenza ha admess als confamigliars la condolientscha: «A las famiglias, a las amias ed als amis ed a tut las persunas participadas giavischa ella blera forza en questas uras tristas.» El ha giavischà a las persunas blessads buna guariziun ed ha engrazià a las forzas d’acziun e da salvament per lur engaschament.