La tartaruga

In animal da casa ei savens dapli che «mo» in animal. El ei in bien amitg tras la veta. Ed exact pervia da quei fa ei fetg mal, sch’el svanescha tuttenina.

Quella dolur hai jeu fatg atras dacuort.

Müstair ei il liug nativ da mia mumma. Nus essan savens en quei bi vitg. Leu habitein nus en ina casa veglia e gronda cun in bi curtin. Era la tartaruga da mia mumma astga far il viadi a Müstair. En siu curtin cun seiv astga la tartaruga semuentar libramein igl entir di.

In di da bial’aura van mia mumma e mia sora a spass. Cuort avon lessen ellas dar in’egliada sin la tartaruga. E lu la surpresa. Ella ei buca pli leu. Ina ruosna el tratsch muossa che la tartaruga ei fugida sut la seiv ora. Immediat ha la tscherca entschiet. Mo encurir ina tartaruga in tec pli gronda ch’in maun, en in curtin plein caglias e plontinas, ei empau sco encurir ina guila el fein.

Gest en quei mument telefoneschel jeu a mia sora. Ella salida mei e di: «La Conchita ei scappada.»

Quella novitad sveglia en mei dapli che quei ch’jeu havess spitgau. Dapi mi’affonza habitescha la Conchita (in num spagnol che vul dir «conchiglia pintga») tier nus. Uss hai jeu 53 onns e selegrel aunc adina cu ella leva la primavera. La stad viva ella cun nus en curtin ed igl unviern dorma ella profundamein en tschaler.

E quei ei ussa vargau per adina? Nua ei ella? Va ei bein cun ella? Paupra Conchita.

Suenter encurir ditg informescha mia sora las vischinas ed ils vischins ed jeu hai scret ellas medias socialas che nus encurin nossa tartaruga.

«Sch’ella ei naven, eis ella naven uss», di mia mumma.

Mo encunter sera enquera mia sora vinavon – ed ha veramein anflau la Conchita! Gnanc lunsch naven dalla casa era la «pôra bes-cha» (sco las Jauras ed ils Jauers dian), retratga anavos en siu cuirass. Ella para dad haver tema. Mo mia sora ha immediat purtau ella a casa. Cuort suenter lai Conchita gustar in tec salata.

La seiv ei ussa pli ferma, aschia che la tartaruga sa buca pli scappar. Il levgiament ei fetg gronds. Ed a mi ei vegniu pertscharts, tgei che mintga solit animal sa muntar ella veta.

Madleina Manetsch lavura sco responsabla per la furmaziun professiunala en in center da sanadad a Männedorf. Ella è mamma e viva cun sia famiglia al Lai da Turitg.