Minimal regress tigl stgamgiamaint

Venderde passo è cumparia igl rapport annual 2025/26 da Savognin Pendicularas SA. Igl travagl è cunzont igl anviern cun 110 ampluias egn digls gronds patrungs an Surses. Sur onn lavouran cun pendicularas e gastronomia 26 persungas per chella interpresa.

La stad 2025 on las pendicularas transporto 133 063 giasts, chegl tg’èn 15,5 % daple tgi anc la stad 2024. Igl anviern 2025/26 èn nias transportos 1,452 milliuns persungas. Chella somma è sa redutgeida per 5,5 %. La stad 2025 on las pendicularas profito dalla bel’ora, chegl tg’è er actualmaintg sto igl cass, scu tgi Curdin Baltermia, igl directour tecnic ò detg anvers la FMR.

Igl davos anviern èn las relaziuns dallas pistas dallas Martegnas a Savognin er stadas optimalas graztga alla neiv artifiziala e la lavour exemplarica digls ampluias. Las pistas tg’è betg pussebel d’annavar ins ò betg savia darveir per l’antschatta digl anviern 2025/26. Cun dar igl favrer pulit neiv è la situaziun alloura sa midada an senn positiv. Scu tgi Markus Schröcksnadel, igl president digl cunsegl d’administraziun da Savognin Pendicularas SA, screiva aint igl rapport annual, sa mossa adegna daple tgi igls giasts sa decidan a curta vista per neir ainten la regiun per eir cun skis, chegl cunzont sen fundamaint dallas cundiziuns da neiv.

En augmaint da 10,4 % tar la gastronomia

Igl retgav da menaschi digl davos onn da gestiun dalla societad acziunara monta a 9,427 milliuns francs. An cumparaziun cugl onn da gestiun precedent è chegl en regress da 0,7 %, detg oter exact 67 153 francs pi pac.

Las antradas digl transport tar las pendicularas èn sa redutgeidas per 4 % sen en total da 6,505 milliuns francs. La sviouta laterala tar las pendicularas monta a 317 173 francs ed è per 7,1 % pi ota tgi anc igl onn avant. Cun en augmaint da 10,4 % ed en total da 2,524 milliuns francs è la sviouta tar la gastronomia s’augmentada igl onn da gestiun 2025/26 per ena bela cefra. L’ora magnifica è stada la raschung principala tgi gist las ustareias da muntogna dallas pendicularas on fatg miglers affars.

84 300 francs taglia

Igls costs digl persunal digls davos onn montan a 3,369 milliuns francs ed èn per 5,7 % pi ots tgi anc igl onn da gestiun 2024/25. Chel augmaint è er d’attribueir agls costs supplementars digl persunal dalla gastronomia.

Las expensas totalas da menaschi schean tar 6,723 milliuns francs ed èn per 4,7 % pi otas an cumparaziun cugl onn precedent. Amortisaziuns ò la societad acziunara fatg per ena somma da 2,243 milliuns. Taglia è neida paeda per ena somma dad 84 300 francs. Sa resulto è alla fegn finala en gudogn da stgers 7000 francs.