«Solo tribuna» dapertut – omagi a Zarli Carigiet

L’Uniun Trun Cultura ei vegnida fundada cugl intent d’intermediar las ovras dils frars Alois e Zarli Carigiet sco era dils frars Matias e Hendry Spescha. Sper quella finamira promova ella baghetgs da muntada historica a Trun. Commembras e commembers dall’uniun ch’ei vegnida fundada igl onn 2020 ein denter auter representantas e representants dallas famiglias dils artists e persunas che lavuran professiunalmein per la cultura. La finamira ei da mantener e render visibel il vast patrimoni cultural da Trun – ed el cass concret dil Festival Dapertut da seregurdar da Zarli Carigiet. Menadra artistica dil festival ei Moni Wespi d’Almens, enconuschenta per sia lavur sco coreografa, artista visuala e dessignadra. Paula Nay ed Esther Berther ein menadras da producziun dil festival che ha liug da venderdis, ils 28 d’uost tochen dumengia ils 30 d’uost 2026.

In format particular

La fuorma, sco il Festival Dapertut vegn purschius, ei singulara. «Quei ei in niev format. Jeu persunalmein hai aunc mai viu enzatgei semegliont en Surselva», constatescha Paula Nay. Particular ei surtut il grond diember da diesch loghens dallas presentaziuns: Per exempel sigl areal dalla Casa Carigiet e dil Plaz Cadruvi, els curtgins dil Museum Cuort Ligia Grischa e dalla Casa Desax, mo era sigl areal dall’anteriura fabrica da ponn. Mo lu era en ulteriurs loghens, aschilunsch che l’aura lubescha quei. Il center dil Festival Dapertut ei ella Casa Carigiet. Leu sesanfla era la gastronomia pigl arranschament. En cass da schliat’aura han las presentaziuns liug ellas localitads per la cultura el center communal a Trun.

Curtgins e streglias

«L’idea da quei festival ei che la glieud sappi vegnir a tedlar e mirar las presentaziuns, gest tenor gust ed interess», di la conorganisatura Paula Nay e manegia plinavon: «Alla glieud vegn buca mo offeriu in program da cultura ed art fetg variont, mobein era la pusseivladad da veser interessantas localitads e curtgins forsa aunc nunenconuschents. Per part han las presentaziuns era liug en streglias da Trun.» Ina dallas sfidas da quei project seigi da garantir che tut mondi aschidadir bein maun en maun, era tecnicamein.

Musica, cabaret e teater

En diesch differents loghens el vitg a Trun sepresentan 15 formaziuns duront ils treis dis dil Festival Dapertut. Tut en tut ein 21 presentaziuns da veser ed udir. Leu, en quels loghens, vegnan tribunas quadraticas dad 1,2 meters cun differentas colurs plazzadas. Gest tenor grondezia dallas formaziuns san las tribunas vegnir adattadas. Ellas duein regurdar vid la «tribuna solo» – ina tribuna per in um – che Zarli Carigiet haveva creau per sias presentaziuns. Il program ch’il Festival Dapertut porscha ei varionts ed interessants enina. «Nus purschin producziuns da musica, cabaret, teater, circus, sault e performance. Cun quella varietad lein nus offerir enzatgei ad ina e scadin. Il festival ei era in liug da sentupada», manegia Paula Nay. Tuttas producziuns ein adattadas per la «tribuna solo» – vul dir per sepresentar sin ina tribuna pintga. Las 15 formaziuns secumponan ton d’artistas ed artists indigens sco era d’ordeifer, per part era digl exteriur. La gronda part dallas presentaziuns ei per romontsch e tudestg, mo lu era d’auters lungatgs sco talian e franzos.

Corin, Mattiu e Homo Humus

Il program cumpeglia producziuns da cant e musica denter auter da Corin Curschellas, Las Buobas Scherrer, Mattiu ed Alexi e Marcus. Da veser ei Fabian Krestel e siu circus contemporan ni il cabarettist Luca Maurizio che lai entupar il Homo Humus cun Zarli Carigiet. David Flepp inspirescha ed animescha uniuns da teater da sefatschentar cun Zarli Carigiet e Dominik Muheim porta satirica silla tribuna. Da veser ei il Teater giuven grischun cun Angela Collenberg ni era il cabarettist Flurin Caviezel. Rodund 50 voluntarias e voluntaris ein engaschai avon, duront ni suenter il festival per che quel reusseschi.