Tschertgà persunas rumantschas per registraziuns

Il team dal «Atlas dal Grischun Rumantsch» tschertga persunas da lingua rumantscha per registraziuns da lingua e da tun. Quai scriva la Scola auta da pedagogia dal Grischun (SAPGR) en ina communicaziun a las medias. La finamira dal studi è da registrar la diversitad linguistica dal rumantsch e da la render visibla en in atlas linguistic digital. Quel duai servir sco basa da datas per la scienza e porscher a la vasta publicitad in access al bain cultural rumantsch.

Entant ch’i dat gia atlas digitals per autras linguas naziunalas svizras, mancava fin uss ina documentaziun cumplessiva dal rumantsch che vegn discurrì actualmain. Per l’atlas linguistic vegnan perquai interrogadas 300 persunas da l’entir territori rumantsch davart lur dialect.

En il rom d’in studi preliminar cun passa 1000 persunas èn sco che la SAPGR communitgescha vegnidas rimnadas l’onn passà datas linguisticas cun agid d’ina enquista online. Ils resultats mussan co ch’il rumantsch discurrì sa differenziescha anc adina regiunalmain e localmain, ma era tranter differentas gruppas socialas. Il project che vegn promovì dal Fond naziunal svizzer dura quatter onns e vegn realisà a la SAPGR en collavuraziun cun l’Universitad da Friburg. (cdm/fmr)