Ün ulteriur recuors cunter l’Infra
Üna vschinauncha d’Engiadin’Ota ho inoltro ün recuors da survagliaunza cunter l’Infra. L’imbüttamaint es cha l’organisaziun purtedra da la plazza aviatica a Samedan hegia cuntrafat a las prescripziuns chantunelas da finanzas.
La cumischiun sindicatoria d’üna vschinauncha purtedra ho inoltro ün recuors da survagliaunza (Aufsichtsbeschwerde) cunter l’Infra, l’organisaziun purtedra publica da la plazza aviatica a Samedan. Que ho rapporto il «Corv Engiadinais», üna publicaziun cun sguard critic sülla politica d’Engiadin’Ota in sia ediziun chi’d es cumparida l’eivna passeda. Tenor quel rapport vo que pels raps cha l’Infra ho clappo da las vschinaunchas pel proget da renovaziun decis l’an 2017 chi nun es però zieva mê gnieu realiso. 6,5 dals 8,5 milliuns francs decis quella vouta in üna votaziun haun las vschinaunchas pajo our a l’Infra. In sieu bilauntsch hegia l’Infra declaro fos quel import scu egen chapitel, sainza explicaziun per che precis cha’ls raps sun gnieus druvos, sto scrit i’l «Corv Engiadinais».
Chantun conferma recuors
Il Chantun conferma sün dumanda cha’d es rivo tar el ün recuors d’üna vschinauncha purtedra e cha quel reclama cha l’Infra nu s’hegia tgnida vi da las prescripziuns chantunelas da finanzas. Pü precis nun infuorma’l però davart il cas. Il departamaint da finanzas e vschinaunchas scriva, cha i’l cas da quist recuors nu sajan stedas accumplidas las cundiziuns per gnir activ. «Las autoriteds chantunelas da controlla dispuonan be d’üna cumpetenza limiteda d’examinaziun per elavurer cas da survagliaunza e stöglian generelmaing agir discretamaing tar intervenziuns dal dret da survagliaunza.»
Oter recuors auncha tal Güdisch federel
L’ütilisaziun e la declaraziun dals raps pel proget mê realiso cun il nom «Kernentwicklung», decis dal suveraun l’an 2017, vegnan critichedas eir in ün oter recuors: Quel a reguard ils drets da vuscher in connex culla votumaziun dals 17 avuost 2025. Tar quella vaiva üna magiurited da las votantas e dals votantas acconsentieu üna finanziaziun publica da las vschinaunchas purtedras da totelmaing 38 milliuns francs e garanzias per ulteriurs 20 milliuns francs per ün nouv proget da renovaziun da la plazza aviatica.
Eir quel recuors criticha l’intransparenza davart l’anteriur proget e las infurmaziuns dedas illa missiva da votumaziun. Zieva cha’l Güdisch superiur dal Grischun ho refüso quel recuors, stu uossa eir auncha decider il Güdisch federel in chosa. Perque nun es quella decisiun da votumaziun intaunt auncha valabla – ed ils raps nu sun intaunt auncha pajos a l’Infra.
Gust da leger dapli?