Üna fracziun «Nairs» cuostess da massa
Sün racumandaziun dal Chantun ha la suprastanza da Scuol ponderà da crear üna nouva fracziun «Nairs» – per quietar là il trafic sülla via chantunala. Ma ella ha sbüttà la proposta per radschuns finanzialas. Pitschens adattamaints pel trafic daraja però listess.
Daspö bundant quatter ons es in servezzan a Nairs il tancadi cun ün cafè, üna butietta ed üna lavandaria d’autos. Cha quel haja daspö quella jada chaschunà bainquant trafic chi aintra e sorta da la via chantunala, constata la suprastanza cumünala da Scuol tenor il protocol da sia sezzüda als 27 lügl 2026. Sül traget pertoc da la via chantunala vala il limit regular da tempo dadour lös abitats, dimena 80 km/h. E güst davant il tancadi daja ün traget chi vain predschà per tschüffer oura, sco cha la suprastanza scriva, «quai chi chaschuna situaziuns criticas cul trafic chi sorta da la parcella dal tancadi». Tenor la Pulizia chantunala ha il trafic dal tancadi chaschunà fin uossa ün’unica collisiun da davo aint in favrer 2025.
Scumond da tschüffer oura
L’Uffizi da construcziun bassa prevezza d’introdüer sül traget pro’l tancadi ün scumond da tschüffer oura, sco ch’el exista eir fingià ün toc plü vers ost, pro la sortida da l’Hotel Palace e’l Center da cultura a Nairs. Il seguond scumond a Nairs dess valair sün ün traget da var 280 meters sülla gualiva cha la via chantunala fa pro’l tancadi, fa savair la Pulizia chantunala.
Sco cha la suprastanza cumünala da Scuol scriva i’l protocol da sia sezzüda, ha la Pulizia chantunala però eir proponü al cumün üna reducziun da tempo sün 50 kilometers l’ura. Quai cun introdüer üna nouva fracziun «Nairs» cun ün traget da via cumünal. Quai vess per consequenza «cha’l cumün stess surtour la respunsabiltà per las lavurs e’l mantegnimaint», constata la suprastanza implü.
5000 fin 10 000 francs l’on
Tenor sias calculaziuns vess il cumün da Scuol da far quint cun cuosts da 5000 fin 10 000 francs l’on, sch’el introdüess ün nouv traget cumünal a Nairs e surdess il mantegnimaint da quel a l’Uffizi chantunal da construcziun bassa: tanter oter per rumir la naiv, sterner sal e pulir la via, sco prescrit dal Chantun, ses jadas l’on.
Ma la suprastanza es da l’avis cha’ls cuosts per quista nouva fracziun «Nairs» füssan massa ots. Ella ha refüsà la dumonda dal Chantun d’introdüer ün nouv traget cumünal a cun quai tempo 50 a Nairs.
Sco cha la Pulizia chantunala scriva, po tempo 50 insomma be gnir introdüt cun inoltrar ün traget cumünal. Ed eir otras masüras da trafic, sco per exaimpel l’introducziun da tempo 60, stessan gnir dumandadas dal cumün. Quel stess ouravant laschar far ün’expertisa davart la masüra intenziunada. (fmr/mst)
Gust da leger dapli?