Varga 100 canzuns romontschas online
Ella pagina d’internet www.chanzunrumantscha.ch san ins ussa consultar 106 canzuns ch’ein vegnidas cumponidas pils emprems treis Festivals da la chanzun rumantscha a Trun, Zuoz e Vella. 24 canzuns mauncan. Quellas ein buca vegnidas lubidas da publicar.
El mument ein biaras dirigentas e dirigents da chors vidlunder d’encurir novas canzuns pil proxim onn da cant. Da niev dat ei ina offerta che levgescha forsa quella tscherca. Dirigentas e dirigents san prender envesta online da 106 canzuns da 37 cumponistas e cumponists che han contribuiu als treis emprems Festivals da la chanzun rumantscha a Trun (2019), Zuoz (2022) e Vella (2025). Sch’ina dirigenta ni in dirigent ha ina canzun che plai, sa ella ni el dumandar la cumponista ni il cumponist per las notas. Per che quellas notas vegnien buca copiadas senza lubientscha, ein ellas mintgamai marcadas cun ina trav. Ina gliesta cun las adressas dad e-mail da quels cumponists e cumponistas ei era publicada silla pagina da web.
Per tut ils chors
La raccolta da canzuns porta ina gronda schelta per las dirigentas e dirigents. Ella pagina da web dall’uniun La chanzun rumantscha san ins eleger denter 42 canzuns per chor mischedau, 30 per chor viril, 24 per chor d’affons e diesch canzuns per chor da dunnas. Las cumponistas ed ils cumponists da tut quellas canzuns derivan dalla Bassa, dil Grischun ed era dalla Surselva. 24 canzuns dils treis festivals vargai mauncan denton, perquei che la cumponista ni il cumponista ha buca lubiu da publicar ellas entochen oz.
Fetg buna purschida
Il dirigent dil Chor Uvriu Danis/Tavanasa, Daniel Pally, ei era president dil District da cant Surselva. El di che la nova purschida cumpleta dallas canzuns dils festivals seigi ina fetg buna. «Jeu mez hai adina puspei cantau cun miu chor Uvriu canzuns dils Festivals da la chanzun rumantscha. La nova purschida cumplessiva da tuttas canzuns ei ina buna fontauna che sa vegnir duvrada da tuttas dirigentas e dirigents.»
In giavisch
Clau Scherrer, il president dall’uniun La chanzun rumantscha di che pliras dirigentas e dirigents hagien giavischau che las canzuns vegnien publicadas enzacu. «Entochen ussa havevan nus adina publicau mo las canzuns dil davos festival. Ed ussa ein pia tuttas canzuns accessiblas. Per Clau Scherrer eis ei da grond avantatg che dirigentas e dirigents vesan tgei canzuns ch’ei dat insumma dils treis festivals vargai. «Nus Romontschas e Romontschs havein buc in liug definiu per tut quei ch’ei niev e per tuttas notas dils chors, ed aschia empruein nus da metter tut quei da nos festivals sin nossa pagina da web.»
Tuc la noda
«Al di da cant a Trun, igl unviern vargau, havein nus cantau exclusivamein canzuns dil Festival da la chanzun rumantscha», di il musicist Clau Scherrer. «Nus havein giu l’impressiun che las cantaduras ed ils cantadurs contan fetg bugen quellas canzuns. Dil basegns enneu duvrass ei buca biaras novas cumposiziuns. Nus Romontschas e Romontschs havein atgnamein canzuns avunda. Ei dat bunamein dapli canzuns che Romontschas e Romontschs.» Clau Scherrer declara ch’ei drovi denton tuttina enqual canzun nova per che la cultura da cant ella Romontschia vivi vinavon. Ed il success dalla concurrenza da cumposiziuns seigi claramein avonmaun cun mintgamai 50 cumposiziuns novas als festivals. «Naturalmein che era las cumponistas ed ils cumponists han interess da crear novas canzuns ed esser cun quellas datier dalla glieud. E quella schanza da vegnir datier dils chors e dalla basa han els cul Festival da la chanzun rumantscha.»
Allas canzuns dils davos treis Festivals da la chanzun rumantscha han ins access sin www.chanzunrumantscha.ch.
Gust da leger dapli?