Accident en il tunnel Crapteig

In um da 44 onns era, sco che la Polizia chantunala dal Grischun scriva en sia communicaziun als meds d’infurmaziun, enturn las 13.30 en viadi sin l’A13 en direcziun Tusaun. En ina storta lunga a dretga en il tunnel Crapteig è el vegnì sur la lingia da segirezza dubla vi sin il vial da surpassar ed è collidà cun in auto da persunas che vegniva encunter. Ils autos a travers han manà ad ulteriuras collisiuns. En tut èn quatter vehichels collidads ed han stuì vegnir chargiads e transportads davent. La cunpassagiera da l‘auto che vegniva encunter sco era l’um da 44 onns han il Salvament Grischun Central ed il Salvament Cuira transportà cun mintgamai in auto da salvament en l’ospital a Tusaun. Tar l’um da 44 onns è in test d’alcohol en il flad stà positiv ed ins ha ordinà ina controlla da sang.

Lunga colonna causa grond traffic 

Durant la registraziun da l’accident e las lavurs da salvament e da rumida è l’A13 restada serrada. Pervi dal grond traffic hai dà ina lunga colonna. La Polizia chantunala dal Grischun ha svià il traffic sin la Via taliana e manà il traffic pesant en ils spazis da retegn. Ils pumpiers da Tusaun ed Andeer eran pronts per cumbatter in eventual fieu en il tunnel. Suenter bundant trais uras han las forzas d’intervenziun puspè dà liber al traffic la A13 en omaduas direcziuns.