Augmentau l’indemnisaziun dils pumpiers
Il cussegl da vischnaunca da Trun ha acceptau il gliendisdis sera dus reglaments. El ha dau triev ad ina damonda da credit dalla suprastonza communala per abonnaments da sport.
En sia seduta da gliendisdis, ils 24 d’uost 2026, ha il cussegl da vischnaunca da Trun acceptau la revisiun parziala dil reglament per far diever dallas vias d’uaul cun vehichels a motor. Primavera proxima vegn introduciu in sistem da pagar digitalmein lubientschas dil di per carrar sin vias d’uaul. Sco il cussegl da vischnaunca e la suprastonza scrivan en ina communicaziun als mieds da massa, vegn il prezi per la carta dil di augmentaus da siat sin diesch francs.
Dapli daners pils pumpiers
Il parlament communal ha medemamein acceptau la revisiun parziala dil reglament da schulda e castitgs dil Corp da pumpiers Sumvitg-Trun. La revisiun pertucca l’indemnisaziun dils pumpiers. Cun augmentar quella duei vegnir garantiu ch’il corp hagi avunda pumpiers e che pli biars s’interesseschien per funcziuns da cader. Il mument dumbra il Corp da pumpiers Sumvitg-Trun 67 dels.
Abonnaments da sport
Per promover l’activitad da far sport dils affons e giuvenils ha il cussegl da vischnaunca da Trun acceptau in credit pil sustegn finanzial d’abonnaments da sport. Quel duei vegnir introducius en fuorma d’in sistem da bonus sco project da pilot. Ils cuosts annuals persuenter schazegia la suprastonza sin 30 000 francs. Pertuccai da quella purschida ein 161 affons e giuvenils cun ina vegliadetgna d’entochen 18 onns.
Gust da leger dapli?