Il caset da sport multifuncziunal

La plazza da sport sper igl anteriur center communal da Degen para oz nunduvreivla. Fessas, bots e mescal ein indezis dalla vegliadetgna dil plaz che vegneva duvraus pli baul da scolaras e scolars. La vischnaunca da Lumnezia ha ils 7 d’uost 2026 presentau il project dalla nova plazza da sport alla radunonza communala. Sper la plazza da sport multifuncziunala vegn era planisau a Degen ina nova plazza da giugs sper l’ustria Nua Lumnezia e novs panels solars sil tetg dall’anteriura casa communala. La plazza da sport e quella da giugs vegnan a custar ensemen circa 320 000 francs. Il project sco tal che vegness a custar entuorn 385 000 francs ei vegnius approbaus ed ei uss ella planisaziun.

La plazza daventa in caset

L’actuala plazza da sport a Degen stoppi vegnir renovada. Quei era gia ditg evident, sco il president dalla vischnaunca da Lumnezia, Daniel Solèr, declara sin damonda dalla FMR. En tgei fuorma era denton aunc aviert. La cumissiun da giuventetgna ha lu giu l’idea da far ina plazza per giugar «padel», in sport semegliont al tennis ch’ei daventaus ils davos onns pli populars tier ils giuvens e las giuvnas. Per saver giugar padel vegn ei denton duvrau in plaz cun preits, pia sco in caset.

A Daniel Solèr ha quella idea plaschiu. El e la suprastonza han denton saviu sviluppar vinavon l’idea d’ina plazza da padel. «Nus havein manegiau da gest far ord l’idea d’ina plazza da padel ina plazza da sport multifuncziunala.» Enstagl da haver in liug che porscha mo in’activitad, vegn Degen pia a haver ina plazza nua ch’ins sa giugar per exempel ballapei, basket, unihockey, pickel ball e padel.

Degen sco center polisportiv

​Il vitg da Degen ei buca localisaus gest sper la via principala che meina dalla Lumnezia en. Perquei setschenta la damonda, sche la glieud vegn insumma a far diever dalla nova plazza da sport. Daniel Solèr ei dil meini: «Naturalmein havein nus era tschentau quella damonda. La cumissiun da giuventetgna ha purtau l’idea a nus en suprastonza. Cunquei essan nus stai perschuadi dil project ed ei ha mussau a nus la necessitad e ch’ei vegn segir fatg diever da quella purschida, cu tut ei realisau.»

Cun la nova plazza da sport multifuncziunala daventass Degen in cert center polisportiv ch’ei dat, en quella fuorma, aunc buc ella regiun. «Forsa vegnan lu era persunas d’ordvart la Lumnezia», spera il president communal.

La planisaziun ha entschiet

Ils detagls dil project vegnan aunc planisai. La visualisaziun muossi gia bein co ei vegn a veser ora, di Daniel Solèr. Cazzolas vegnan per exempel buca plazzadas, muort disturbi da glisch ella vischinonza. La finala vegn il plaz ad haver ina grondezia da surfatscha da 13 sin 21 meters. Gardarobas e duschas dat ei gia ella casa communala. Las lavurs vid la plazza duessen esser finidas aunc uonn.