Ina tschertga difficila
Ils 27 da settember 2026 è il prim scrutini per il presidi communal da Bravuogn Filisur. Fin ussa na vul dentant nagin candidar e succeder a Luzi C. Schutz en uffizi. Quai malgrà ch’ina cumissiun da tscherna ha pledentà passa diesch persunas.
En in mais elegia la populaziun da Bravuogn Filisur in nov president communal. Candidatas u candidats uffizials na datti dentant anc betg. L’elecziun a l’urna dils 27 da settember fetschian ins tuttina, pia independentamain da las candidaturas, sco ch’il president partent Luzi C. Schutz ha ditg envers la FMR: «Era persunas che na candideschan betg uffizialmain èn elegiblas. En quest cas èsi però pli grev da cuntanscher la maioritad absoluta ch’i dovra en l’emprim scrutini.»
Senza candidaturas uffizialas saja in segund scrutini – lura cun il pli relativ – perquai pli probabel necessari. «Sa chapescha sperain nus ch’insatgi s’annunzia anc», ha il president partent (guarda box) ditg. Sco che las experientschas dad autras vischnancas mussian er, na saja la tschertga dentant betg simpla: «Il presidi è in uffizi pretensius, ma en mintga cas er attractiv ed interessant. In problem è savens il pensum ch’è dapli che 50 %, ma era betg ina lavur cumplaina. Quai sto esser adattà a la situaziun da vita.»
Infobox: President dapi la fusiun
Luzi C. Schutz è l’emprim president da la vischnanca fusiunada Bravuogn Filisur. El è entrà en uffizi il 1. da schaner 2018, suenter ch’el aveva gudagnà cleramain il cumbat electoral cunter Stephan Mettier (272 cunter 84 vuschs). Alura aveva il president partent 29 onns.
Nov onns e trais legislaturas pli tard surdat Luzi C. Schutz il presidi en novs mauns. Gia la primavaira 2025 aveva el annunzià da betg pli vulair candidar. Sco il president han plinavant er ils ulteriurs commembers da la suprastanza decidì da betg pli candidar per in’ulteriura legislatura, uschia ch’i dat ina midada cumplaina. Ils suprastants e las suprastantas partentas èn: Rico Florinett, Johannes Schmid, Madleina Schutz e Jana Cavelti.
«Modestamain optimistics»
Quant grev ch’igl è da chattar in nov president u presidenta, quai sa era Jürg Hanselmann. Il deputà en il Cussegl grond fa part da la cumissiun che tschertga dapi mais ina successura u in successur per Luzi C. Schutz: «Nus avain pledentà passa diesch persunas, fin ussa dentant be gì refusas. Dad ina persuna spetgain nus anc quest’emna ina resposta.» E sch’era quella dat in chanaster, fetschian ins in’ulteriura communicaziun a las medias. «Anc uss essan nus modestamain optimistics», ha Jürg Hanselmann ditg.
Sco ch’il deputà en il Cussegl grond ha constatà plinavant, refusan las bleras persunas ina candidatura per il medem motiv, il temp: «Tgi che ha in relativamain grond pensum da lavur, na po betg surpigliar dasperas il presidi. E tgi che ha plaschair da sia lavur, na vul era betg chalar per daventar president communal.» Perquai haja la cumissiun – che dumbra radund diesch commembers da las pli differentas branschas – era contactà l’ina u l’auter giuven pensiunà, uschia Jürg Hanselmann: «Quellas e quels vulan dentant sco emprim giudair lur pensiun e betg surpigliar novas lavurs.»
Indemnisaziun e duairs
Sco che Luzi C. Schutz ha ditg, n’è il presidi dentant betg mo en la cumissiun da tscherna ina tematica. En connex cun las difficultads da chattar candidatas e candidats saja era la suprastanza sa fatschentada cun quest uffizi: «Nus avain surlavurà il reglament d’indemnisaziuns ed il carnet da duairs. Las incumbensas duain esser definidas meglier ed il post dal presidi pli attractiv.» Davart quellas midadas decidia la radunanza communala il settember.
Entant ch’il presidi procura probablamain anc per in pau rumpatesta, n’èsi stà nagin problem da chattar candidats per la suprastanza. «Els èn tuts s’annunziads da sezs», ha Jürg Hanselmann ditg davart las tschintg candidaturas per ils quatter sezs d’occupar: Remo Hugentobler (Bravuogn), Roger Zysset (Bravuogn), Jannik Ehinger (Filisur), Melchior Zumbach (Filisur) e Christian Schmid (Latsch). L’elecziun da la suprastanza communala sco era da commembers da la cumissiun da gestiun, da l’instanza da construcziun e dal cussegl da scola èn ils 25 d’october 2026.
Gust da leger dapli?