Rinforzar insembel la fuormaziun professiunala

«La fuormaziun professiunala es i’l Grischun dal Süd da grond’importanza sociala ed economica», comunicheschan las respunsablas ed il respunsabel da las trais regiuns politicas: per la Regione Bernina Moreno Cortesi, per la Region Maloja Claudia Jann e per la Regiun Engiadina Bassa/Val Müstair Martina Schlapbach. Per mantgnair quista fuormaziun illas trais scoulas professiunalas Samedan, Poschiavo e Val Müstair s’ingascha la gruppa da lavur cul nom «Mantegnimaint da la scolaziun professiunala Grischun dal Süd». Quella pussibiltescha a giuvenilas e giuvenils dad imprender numerus mansters sainza stuvair bandunar las regiuns. D’incuort s’ha la gruppa cun rapreschantas e rapreschantants da scoulas professiunalas e cumüns da las trais regiuns chattada per üna prüma seduta da lavur. «Nossa collavuraziun pussibiltescha da trar a nüz sinergias tanter las scoulas e da spordscher scolaziuns eir be cun pacas giarsunas e giarsuns», as legia illa comunicaziun als mezs d’infuormaziun. Als 17 settember 2026 organisescha la gruppa da lavur a Puntraschigna ün arrandschamaint d’infuormaziun.