Cudesch fundiari rinforza organisaziun

L’Uffizi fundiari Malögia ho, scu ch’el scriva in sia comunicaziun als mezs d’infurmaziun, l’an passo fat grands progress cun evader las pendenzas. In conguel cul principi da l’an 2025 ho la cifra da quellas pudieu gnir redütta per circa ün quart e scurznieu il temp d’elavuraziun da var ses mais (schner 2025) sün var trais eivnas. Per rinfurzer l’uffizi dal cudesch fundiari a lungia vista s’ho que eir analiso ed adatto las structuras da l’uffizi. Quel lavura uossa cun las structuras adattedas.

Rinforzamaint persunel

Parallelmaing sun eir gnidas cumplettedas las resursas persunelas. Daspö avuost 2026 sustegna Hans Andrea Däscher l’uffizi fundiari per ün temp limito scu administratur dal register fundiari. Impü rinforza Franziska Diem a lungia vista il team scu collavuratura giuridica. La giurista deriva oriundamaing da San Murezzan. Sper las imsüras internas cuntinuaro l’Uffizi fundiari Malögia eir ad amegldrer la collavuraziun cun sieus partenaris externs ils pü importants. Per l’utuon 2026 es perque planiso ün barat cun rapreschantants e rapreschantantas da büros da giurists, notars e bancas. «Nossa finamira es clera: Nus vulains esser ün uffizi fundiari ferm e fido chi’d es bun dad accumplir las grandas pretaisas da la Regiun Malögia cun sias bgeras immobiglias», conclüda Barbara Aeschbacher, la presidenta da la conferenza da presidents da la Regiun Malögia. (cdm/fmr)