Festival d’illuminaziun ed art

«Breil glischa envida in e scadin da guder muments per contemplar e smarvigliar en tutta calma», scriva Surselva Turissem en ina communicaziun als mieds da massa. Ovras d’art da glisch ed installaziuns vegnan integradas precautamein el spazi public. Aschia vegnan loghens, vias e baghetgs mussai a moda nunusitada. «Cun Breil glischa lein nus mussar l’atmosfera ed il potenzial cultural dil vitg da Breil. Il festival duei esser in’occurrenza per hosps dalunsch e damaneivel ed il medem mument scaffir spazi per sentupadas», di Marina Morgenthaler da Breil glischa.

Art da glisch e musica

Duront las duas fins d’jamna dil festival – la fin d’october e l’entschatta november 2026 – neschan ovras d’art da glisch, projecziuns ed installaziuns en differents loghens publics a Breil. El vitg sefuorman pliras ovras d’art da glisch, projecziuns ed installaziuns. Denter auter la sculptura glischonta «Pialeto» e la sculptura da lenn digl artist indigen Michel Pfister. Il festival vegn cumpletaus cun in program accumpignont: In workshop da teater per affons ed ina show da fiug, praulas e concerts spel fiug. Era la musica gioga ina rolla impurtonta. D’udir e da veser ein Mattiu, Argent Vif e JSO Crescendo.