Il corv ho clamo ad üna discussiun critica

Üna baderleda davart «il provedimaint da sandet e da democrazia in Engiadin’Ota» ho gnieu lö mardi saira in l’Hotel Laudinella a San Murezzan: In ün temp cha la populaziun d’Engiadin’Ota stu auncha üna vouta decider davart il futur da l’ospidel, spitex e centers d’attempos – per intaunt la quarta vouta infra 17 mais. Bundant 50 persunas sun seguidas a l’invid.

«Nus lains spordscher üna discussiun cumplementera e schlargeda davart la tematica», ho dit Jakob Fuchs chi ho modero la baderleda e fo part dal «Forum democrazia directa». Quel ho organiso la discussiun e publicho qualche dis avaunt eir il «Corv Engiadinais» chi commentescha cun pical agüz l’agir politic davart il provedimaint da sandet: «Perque cha las votantas e’ls votants nu d’eiran partecipos illa elavuraziun da las cunvegnas da prestaziun.» Quellas cunvegnas stögliane però appruver als 27 settember a l’urna – u procurer cun ün NA darcho per intschertezza e melsgürezza davart il provedimaint da sandet illa regiun. Scu già aunz ün an.

Uscheja es illa baderleda illa Laudinella per exaimpel eir gnieu discus davart la SGO, la fundaziun in moratori chi ho fat naufragi l’an passo, ma chi posseda aunch’adüna las immobiglias da l’ospidel e las chesas da persunel. Cu cha que vo inavaunt cun quella – ne la missiva da la prosma votaziun nu explicha que, ne las politicras sül palc a San Murezzan. «A nun es il böt da cuntinuer culla SGO», ho dit la presidenta cumünela da Bever e dal cussagl da fundaziun, Selina Nicolay. Que d’eira la declaraziun la pü concreta davart la SGO a la saireda, davart quist’instituziun chi nu po intaunt pü fer üngünas investiziuns in sias immobiglias e stuvaro ünsocura vender quellas – a las vschinaunchas, a la Sanadura u a qualchün oter. 

Tels aspets chi nu vegnan discutos otramaing, que voul il «Forum democrazia directa» mner sül tapet cul «Corv Engiadinais», cun occurrenzas scu in mardi u eir cun üna chartera per remarchas anonimas chi d’eira missa a disposiziun illa Laudinella. S-chars 20 remarchas sajan plachedas in quella in mardi saira, ho infurmo Jakob Fuchs. E cha quellas sajan gnidas surdedas a las partecipantas dal podi – e gnaron eir publichedas sülla pagina d’internet dal «Corv Engiadinais». (fmr/mst)