In pelegrinadi da 30 km sur igl Alpsu

La dumengia vargada ei stau da veser ina colonna da viagiaturs e viagiaturs che mavan a pei sin vias lateralas sisum la Cadi. Els ein vegni sur il pass Alpsu, han fatg in paus a Sedrun ed ein serendi per finir lur viadi a Mustér en claustra. Ei setracta dils vischins e dallas vischinas d’Ursera che han fladau ella burnida da vegls usits ed inflammau quella cun far il liung viadi da sur 30 km. Il punct da partenza ei staus sper la baselgia da sogn Columban ad Andermatt. L’ascensiun dil pass Alpsu meina sin la via da sogn Sigisbert e la processiun da pelegrins ha cuntinuau, suenter in paus sil hospezi, sin las vias lateralas tochen al proxim retegn a Sedrun. Lu ei suandada la part finala sur Mumpé Tujetsch e Segnas tochen alla porta dalla claustra da Mustér.

Fatg reviver in vegl usit

La Val Ursera s’udeva tier la Rezia romontscha. Quei relatan nums da vitgs e da pradas. La baselgia da sogn Columban ad Andermatt, baghegiada egl endischavel tschentaner, ei stada igl emprem sanctuari independent dalla claustra da Mustér. Il di da sogn Placi, ils 11 da fenadur, pelegrinavan ils cartents dad Ursera sur il pass Alpsu tochen Mustér ed anavos. El 18avel tschentaner ha la Revoluziun franzosa lu stinschentau igl usit e 1793 ni 1794 ei il marsch tier sogn Placi staus la davosa gada.

Igl onn 2014 ha la claustra da Mustér festivau il 1400avel onn d’existenza. En quella caschun ha la Corporaziun Ursera clamau il vischins da far puspei il pelegrinadi dad Andermatt tochen Mustér. Igl usit ei renaschius e vegn celebraus mintga quater onns cul liung viadi a pei. Il Talammann d’Ursera vegn eligius el ritmus da quater onns. El ei aschidadir il parsura da la corporaziun.

Mintgamai igl emprem onn da sia perioda d’uffeci van il pelegrins, menai dil Talammann, sin il liung viadi. Els vegnan beneventai digl avat avon claustra e lez legia lura la sontga messa. Suenter survegnan ils pelegrins in refrestg ord cuschina dalla claustra e serendan allura cun tren a casa.

In usit vivius en nies temps actuals

Aschia eis ei era stau la dumengia vargada. Il Talamman Marcel Christen, igl anteriur scarvon Afred Regli ed il bandierel Kolumban Russi han menau varga 60 pelegrins a Mustér. Cun la bandiera digl uors d’Ursera, signaus cun la crusch sco segn dall’appartenenza tier la claustra da Mustér, e cun plirs cafanuns vegls ei la processiun passada alla porta claustrala. Avat Vigeli Monn ha beneventau e festivau la messa. Ils participonts ein vegni envidai suenter en stiva biala da hosps ed han gudiu il puschegn. Il Talammann ha punctuau en siu plaid l’impurtonza dil stentus passadi cun menziunar ils puncts historics mo era l’atmosfera tgeua, la valeta dalla cuminonza e solidaritad che ha regiu duront lur pelegrinadi.