Do re mi fa festa!
La Scoula da musica Engiadina Bassa Val Müstair (EBVM) ha invidà in sonda ad üna gronda festa da giubileum i’l Hotel Scuol Palace. Daspö 50 ons pussibiltescha ella intant ad uffants e giuvenils da la regiun ün’educaziun musicala.
Bain cler chi vain chantà e sunà, scha la scoula da musica invida ad üna festa: Ma per üna jada staivan las persunas d’instrucziun sül palc, na lur scolaras e scolars – sco üsitadamaing als concertins. La «Filarmonia Engiadina», ün orchester da chombra cun magistras e magisters da la scoula da musica, ha pisserà per intermezzos musicals dürant l’act uffizial – cun tocs our da l’opera «Die Zauberflöte» da Mozart. Pellas audituras e’ls auditurs preschaints d’eira miss pront süllas sopchas ün fögl cun notas – uschè chi nu s’ha be cumünaivelmaing fat festa, ma eir musica.
Sparpaglià in tuot l’hotel s’haja implü pudü tadlar cuorts concerts d’anteriuras scolaras e scolars da la Scoula da musica EBVM: Janic e Flurina Sarott, Bigna Guler, Cinzia Regensburger ed oters plü han sunà musica classica, populara e jazz – ad els tuots collia chi han fat lur prüms pass sün lur viadi sco musicistas e musicist da professiun illa Scoula da musica EBVM.
E natüralmaing han eir pioniers, veteranas e promoturs da la scoula da musica quintà a la festa da sfidas, plaschairs, böts e’l scopo d’ün mez tschientiner Scoula da musica EBVM. In seguit üna collecziun da citats our dals pleds festivs a la festa da giubileum.
«La scoula da musica nun es be üna instituziun pedagogica. Ella es eir ün’investiziun illa vita culturala e sociala da nossa regiun.»
Gabriella Binkert Becchetti, presidenta da la conferenza dals presidents Regiun Engiadina Bassa Val Müstair
«Bler idealissem e lavur voluntaria han plan a plan dat üna fuorma a nossa scoula da musica. Nus ot iniziants vain quella vouta cumanzà pro nolla. La scoula da musica Surselva ans serviva sco model.»
Curdin Brunold, co-iniziant da la scoula da musica Engiadina Bassa Val Müstair
«Nus vain gnü la furtüna cha divers magisters da l’Austria e plü tard eir da l’Italia s’han interessats da gnir pro nus. Uschè eschan nus dvantats üna cumünanza trilingua.»
Flurinda Raschèr, prüma presidenta ed anteriura co-manadra da la Scoula da musica
«50 ons scoula da musica – quai voul dir: Ün mez tschientiner, i’l qual persunas d’instrucziun musicala s’han sgobats sur uraris, han calculà il temp da viadi tanter cumüns, fat discuors cun mammas e baps, chattà deposits per clavs, notas e valischs d’instrumaints, transpuonà tocs da musica, preparà concerts ed organisà occurrenzas, tscherchà üna seguond o terza plazza parziala.»
Aita Biert, anteriura co-manadra da la Scoula da musica
«Fich positiv es cha la Scoula da musica Engiadina Bassa Val Müstair e las scoulas popularas illa regiun chattan adüna darcheu bunas cooperaziuns, saja quai cun persunas d’instrucziun qualifichadas, cun sportas per l’instrucziun illas lecziuns da bloc o cun progets da chant e da musica.»
Curdin Lansel, inspecter da scoula Engiadina Bassa Val Müstair Samignun
«Culla musica pussibiltaina als uffants ün access ad ün oter muond. Nus sco persunas d’instrucziun musicala portain ad els üna qualità speciala. Eu sun persvas: Scha nus cultivain quel elemaint da l’inscunter musical, in duets, terzets, chomps da musica, cors, ensembles – cha lura s-chaffina üna fiduzcha principala per tuot la vita, culla quala i pon surmuntar blers impedimaints.»
Peter Appenzeller, ami e promotur da la Scoula da musica Engiadina Bassa Val Müstair
Gust da leger dapli?