Gratulaziuns cundidas cun tuccas

«Hey Fabio!» empè da «Hey Jude!» chanta e suna la Musica da Salouf, Mon e Stierva. Savognin celebrescha la sonda en la pli fina bell’aura il pli aut Grischun. Fabio Luzio da Cunter è per in onn president dal Cussegl grond. Sin la plazza da scola sa radunan la populaziun indigena e la prominenza da la politica chantunala.

En il liber datti gril e glatsch gratuit per ina e scadin. En la sala da la scola serva la Giuventetgna da Savognin il past per ils giasts envidads. I dat ina brava pulenta cun charn stagliada. Il vin «Tuma Chastè» deriva dal viticultur Tscharner. Ma pinot noir n’è betg la raschun per tempra lucca e legra festa. Anzi, las risadas datti pervi dals pleds da gratulaziun al politicher da la PLD. Ils schefs e las scheffas da fracziun cundeschan lur pleds cun tuccas e stuccas.

Fabio Luzio veglia be recaltgar mandats

«Sco emprim cordiala gratulaziun al nov president dal Cussegl grond», cumenza Simon Gredig dals Verds ses pleds. «Nus tuts savain che Fabio Luzio na vul atgnamain betg quest uffizi perquai ch’el fiss persvadì da quel, mabain perquai ch’el ha vis l’onn passà tge ‹booster› da carriera ch’igl è.» Valérie Favre Accola haja sco pli auta Grischuna recaltgà in sez en la Regenza. Fabio Luzio veglia uss exnum era profitar e recaltgar bels mandats en cussegls dad ovras idraulicas.

Era Christof Kuoni da la PLD dat piztgadas: «Nus faschain festa en la cuntrada dal nov president dal Cussegl grond ed en la cuntrada dad Origen. Omadus han per mira da manar tants daners sco pussaivel en la regiun. Fabio Luzio cun la vendita da battarias e Giovanni Netzer dad Origen cun emplenir ora uschè blers formulars sco pussaivel per dumondas a melieras da cultura dal Grischun.»

Era Kevin Brunold retschaiva sco nov vicepresident dal Cussegl grond ina gratulaziun garnida cun in’allusiun sin sias ambiziuns. «Jau gratulesch, char Kevin – betg mo per il vicepresidi, mabain gist era gia per tia successiun da Marcus Caduff en la Regenza», di Andri Perl da la PS.

Petta pajada per Stefan Metzger

Anc auters politichers ston tadlar remartgas, per exempel Stefan Metzger sco nov schef da fracziun da la PPS. L’advocat da Zuoz è enconuschent da parter ora brav envers adversaris politics. A Savognin survegn el petta pajada. «Nus en l’Engiadina sentin entant in vent favuraivel, la vallada po finalmain puspè fabritgar, fabritgar, fabritgar», di Nora Saratz-Cazin da la PVL a la raspada da festa. «Vus dumandais uss forsa pertge? Nus sperain ch’il giurist Metzger, ch’è responsabel per la mesadad dals recurs da fabritgar en l’Engiadina, saja occupà il proxim temp cun ses post da schef da fracziun.»

«E co è insumma sa splegada l’elecziun dal schef da fracziun da la PPS?», dumonda Simon Gredig. Il nobel advocat cun il Ferrari da l’Engiadin’Ota haja battì cunter il simpel garaschist da Subaru dal Partenz (remartga da la redacziun: il deputà Thomas Gort). Deplorablamain haja il nobel advocat fatg la cursa – e gliez en ina partida che veglia uschiglio gea esser la partida dal pievel.

Mustgas da conquistar la Valtellina

Magari mitschan er internas picantas en la publicitad a chaschun da talas festas. Bunamain ina crisa internaziunala haja chaschunà ina intervenziun da Reto Crameri en la sessiun da zercladur, ha relatà Flavio Sterli che ha fatg il maior-maisa durant il past da festa. L’anteriur deputà da Belfort haja vulì intimar la Regenza da contrahar cun la Lumbardia per puspè integrar la Valtellina en il Grischun.

Andri Perl sa dumonda en quest connex pertge che questa intervenziun saja lura vegnida retratga uschè andetgamain: «Reto Crameri less para pli gugent daventar in segund Martin Candinas ch’in segund Gieri Genatsch.» E Simon Gredig fora cun la remartga ch’il Center voteschia en il Cussegl grond fitg gugent cun la PPS. Ina differenza essenziala dettia dentant tranter las duas fracziuns: «La PPS penda da preschent si dapertut placats per la neutralitad – entant ch’il deputà Crameri dal Center vuleva propi conquistar la Valtellina.»

«Carmelia curregia gist anc ils commas»

Er ils commembers da la Regenza ston tadlar inqual beffa – e gliez gist da l’agen collega Martin Bühler che dastga sco president da la Regenza tegnair in dals pleds da festa. Nauschas buccas pretendian che Jon Domenic Parolini saja en patratg gia vi dal pachetar la valisch. Gliez na possia el dentant betg confermar, manegia il minister da finanzas. Jon Domenic lavuria exact uschia sco adina.

«Ella enconuscha mintga dossier, ella legia tut e chapescha era tut», di Martin Bühler davart Carmelia Maissen. El dat perquai gist anc in tip a la futura cussegliera guvernativa Valérie Favre Accola: «Sche ti n’has ina giada betg temp da leger ils agens dossiers, n’è quai betg uschè nausch. Carmelia als vegn a leger ed als ta po explitgar. Ed ella curregia gist anc ils commas.»