Presentaziuns dapertut e da tutta sort
Il festival Dapertut ha envidau ad ina fin d’jamna culturala a Trun. Sin diesch pintgas tribunas han 15 formaziuns artisticas realisau in program cun musica, teater, sault ed insumma art da tutta sort. Il program ei staus inspiraus digl artist-cabarettist da Trun Zarli Carigiet.
In festival inspiraus da Zarli Carigiet e sia tribuna solo, quei ha l’uniun Trun Cultura realisau questa fin d’jamna cun il festival Dapertut. Conform a quei num ein vegnidas plazzadas diesch pintgas tribunas mobilas per Trun entuorn: tier la casa Carigiet, sin plaz cadruvi, en baselgia s. Martin, el curtin dalla casa Desax, tiel Spazi Spescha, tiel Museum Cuort Ligia Grischa ed en sala da cultura.
Il connex culla tribuna solo da Zarli ei evidents. Sco igl actur e cabarettist da Trun ein era las 15 formaziuns artisticas e lur publicum buca stai ligiai ad in liug ed han stuiu selimitar sigl essenzial e quei ch’igl ambient porscha. Las tribunas quadraticas dil festival dapertut ein numnadamein mo 1,2 meters liungas e ladas.
Reminiscenzas da Zarli
In connex cun Zarli Carigiet han plinavon era las producziuns sezzas giu. Cunzun tier las presentaziuns teatralas han artistas ed artists saviu sereferir a l’actur-cabarettist da Trun. Aschia ha denter auter Andreas Cadonau scret ina scena che resumescha la veta da Zarli a maun da texts da canzuns e notizias biograficas. Per quei toc cul tetel «Zarli Carigiet, ina avischinaziun» ha Alfred Cathomas giugau la rolla digl actur-cabarettist da Trun. Siu unic requisit ei ina sutga stada.
Ina semeglionta e tuttina dil tuttafatg autra producziun han era duas giuvnas dalla gruppa da teater Cuschnaus realisau. Michela Projer e Norianna Bundi han seschau inspirar dalla ferma mimica da Zarli e realisau ina pantomima clownesca. Mo per il final da lur presentaziun han ellas schau udir lur vuschs, quei per interpretar l’enconuschenta canzun da Zarli «Mis Dach isch de Himmel vo Züri».
Il punct culminont dil program da festival ei en quei connex denton il cabaret da Flurin Caviezel staus. El ha concepiu ina presentaziun per la tribuna solo che l’uniun Trun Cultura ha reconstruiu per l’exposiziun actuala «Davon e davos la culissas» ella casa Carigiet. Per siu program ha Flurin Caviezel interpretau differentas canzuns da Zarli.
Musica, sault ed art da tutta sort
Sper teater e cabaret ha il festival Dapertut denton era dau spazi ad autras fuormas d’art. Sillas differentas tribunas ein denter auter era cantaduras e cantadurs sco Corin Curschellas, Matiu, Las Buobas Scherrer ni era Alexi e Marcus stai. Mo era sault e producziuns participativas han delectau il publicum. Sonda ha igl artist Fabian Krestel envidau ad in malegiar artistic sin plaz cadruvi ed era Quirina Lechman e Gianin Conrad han integrau igl auditori tier lur producziun musicala cun cant d’opera, in bransin ed ina tiba fatga da sez ord bischens.
Insumma, il festival Dapertut ha purschiu duront treis dis in program variont cun varga 20 producziuns. Ulteriuras suondan forsa in’auter onn. Sco las organisaturas han detg enviers RTR, seigi l’idea da realisar ina secunda ediziun dil festival da tribunas (mira box).
Box: In emprem facit positiv
Il festival da tribunas Dapertut ha giu liug per l’emprema ga questa fin d’jamna da venderdis tochen dumengia sera a Trun. Sco Esther Spycher, la responsabla pil project dall’uniun Trun Cultura, ha detg enviers la FMR el decuors dalla dumengia, seigi ei probablamein buca la davosa ediziun: «L’idea ei da far vinavon.»
Mo quei dependi era dil resultat finanzial. Schegie ch’ei detti aunc buca cefras concretas, culla vendita da bigliets seigi ins cuntents aschilunsch: «La prevendita da bigliets per l’entira fin d’jamna ei stada buna e megliera che spitgau. Duront il festival vein nus denton vendiu dameins bigliets per singuls dis.» Mo quei corrispundi era empau all’idea dil festival. Quel sedrezzi buc exnum a persunas che vulan visitar mo singulas producziuns.
Las organisaturas ein cuntentas
Sut il streh quenta Esther Spycher denton che l’uniun Trun Cultura vegni da cuvierer enzaco ils cuosts. In’eventuala secunda ediziun dependa denton buca mo dil resultat finanzial, mobein era dils resuns davart il festival sco tal. Sco las responsablas per l’organisaziun, Paula Nay ed Esther Berther, han detg enviers la FMR duront ina pausa dil program dalla dumengia, seigi quei per gronda part il cass. «Quei ch’jeu hai udiu, ei stau positiv», ha Esther Berther detg. Mo cunquei ch’igl ei stau l’emprema ediziun, hagien ins bein aunc stuiu far l’ina ni l’autra experientscha cul niev format: «Per part ha la glieud aunc giu empau breigias da s’orientar. El decuors dalla fin d’jamna vein nus perquei menau pli activamein il publicum tier las tribunas. Mo era culla plievgia da venderdis sera vein nus constatau ch’il festival da tribunas funcziuna meglier giuado.»
Talas experientschas vegnien ils responsabels plinavon a rimnar per saver evaluar il festival, sco che Paula Nay ha detg. Pér silsuenter suonda la decisiun davart igl avegnir. Ina caussa ei denton clar per ella: «Senza nos super voluntaris mass ei buc. A Trun dat ei in bien coc che segida bugen.»
Dapli impressiuns dil festival cattan ins sin www.rtr.ch ed els canals dall’uniun Trun Cultura.
Gust da leger dapli?