Accidents da bogn ordeifer las uras d’avertura

Silla pagina d’informaziun www.badi-info.ch stat ei scret ch’il Lag la Cauma seigi aviarts e survigilaus naven dils 16 da matg entochen ils 30 d’uost dalla damaun allas 08.30 entochen la sera allas 17.00. Igl areal dil bogn seigi accessibels libramein era ordeifer las uras d’avertura ed ordeifer la stagiun aulta. Mo lu seigi il bogn buca survigilaus. Il giuven Engles da 17 onns ed il vischin dalla Tiaratudestga da 27 onns ch’ein sedisgraziai mortalmein l’jamna vargada a Flem ein senudai allas 17.45 ed allas 19.00, pia cura ch’il bogn dil Lag la Cauma era serraus. Il giuven Engles ei morts gievgia sera suenter ch’el ei vegnius salvaus e la dumengia sera ei in um dalla Tiaratudestga morts. El haveva vuliu salvar in auter senudader en difficultads.

Senudadras e senudaders pauc trenai

Il president communal da Flem, Christoph Schmidt deplorescha ils dus accidents mortals. El renda attents che quels hagien giu liug dad uras che las visitadras ed ils visitaders dil lag seigien sezs responsabels per lur agir. El Lag la Cauma hagi ei dau avon diesch onns il davos accident da bogn mortal. «Quei ch’ins sa constatar ei ch’ei dat adina dapli senudadras e senudaders che van el lag a senudar ch’ein buca trenai ed han pauca cundiziun.» Puncto rinforzar l’informaziun agl ur dil lag di il president communal ch’ei detti negin basegns d’agir acut el mument. «Jeu manegel che mintga singula e singul sto saver giudicar sez tgei ch’el sa e po cun senudar. Impurtont ei da saver ch’ins ha da far cun in lag natural e ch’ins viva l’atgna responsabladad.»

Flums e lags drovan orientaziun

«La senudadra ni il senudader sto saver precis nua ch’ins entra e nua ch’ins banduna in lag ni in flum», di Christoph Merki ch’ei plidader da medias dalla Societad svizra da salvament (SSS). «Ins sto enconuscher e s’informar davart in lag ni in flum.»  En general drovi ei senudadras e senudaders cun ina buna cundiziun che seigien era habels da senudar tschancuns pli liungs era senza contonscher il funs. «In lag ni in flum ei buc in bogn public. En quellas auas publicas sa ei haver animals ni era lenna, crappa ni caglias ch’ins sto untgir. Quei sa caschunar malsegirtads», di il plidader dalla SSS.

Per salvar ina persuna ch’ei en difficultads drovi ei da principi ina scolaziun da salvament. «Senudadras ni senudaders en difficultads ein il bia en panica ed igl ei fetg grev da s’avischinar ad els.» La regla seigi ei perquei da salvar cun ina resca aschi pintga sco pusseivla per quella ni per quel che porscha agid.

Accidents uonn ella media

Il plidader da medias dalla SSS ha detg sin damonda dalla FMR ch’el seigi – suenter la stad cun tons dis da calira – surstaus ch’ei hagi buca dau pli biars gronds accidents da bogn en Svizra. «La SSS ha aunc negina evaluaziun precisa. Mo nus havein uonn ver 40 accidents mortals ell’entira Svizra. Quei ein ella media circa tuttina biars sco ils onns vargai.»

En atgna responsabladad

Era el lag a Davos Munts en Val Lumnezia ei igl agir en atgna responsabladad dumandaus, sch’ins vul ir el lag a senudar. El bogn public ch’ei vegnius aviarts igl onn 1998 dat ei negina entrada. Agl ur dil lag dat ei ina tabla che renda attents il publicum ch’il bogn seigi buca survigilaus. Era il Lag Grond a Laax ei in’aua publica. Duront il fenadur ed igl uost ei il bogn survigilaus. Igl ulteriur temps stat il lag a disposiziun a sportistas e sportists indigens ed jasters. Tenor la vischnaunca da Laax agescha mintgina e mintgin sin atgna responsabladad, e quei seigi era signalisau aschia.