La cunvignientscha secreta dalla nossa val

Schi vous santiz Swift, pansez agl popstar Taylor, a bancas, u agl muteiv, pertge tgi niz oz puspe mengia tard?

I dat tgossas tgi collieschan igl mond: Taylor Swift igl superstar, igls codes da banca da Swift – ed an nossa val igls Suzukis Swift. Dantant tgi la cantadoura amplanescha stadions, transferescha la cefra da banca milliardas dad en conto sen l’oter. Ed igls Suzukis Swift, igls ezs amplaneschan cunzont ensatge, la vart dretga dalla veia. E chegl schi plang tg’ia ma dumond, sch’els on betg zuppadamaintg an senn ensatge.

«Swift» monta atgnamaintg «spert», «dabot» u «svelt». Igl pled vign duvro an engles per descreiver tgossas tgi sa muaintan cun gronda spertezza u tgi capetan an curt taimp sainza incaps. Aha! Ma cò tar nous parigl pitost dad esser en sinonim per «patgific». Pertge i so betg esser ena casualitad tgi blers autos an Surses èn Suzukis e von la madema spertezza, numnadamaintg 20 km/h sot chegl tgi fiss lubia. Ia sung persvadeida, i dat en manual secret tar mintga Suzuki Swift vandia, tgi dei igl suandont sot artetgel 1: «Scu tg’ins fò neir or da senn la persunga tgi carescha davos egn.» Artetgel 2: «Scu frenar an eneda davant mintga stierta.» Artetgel 3: «Scu scolar igl seisavel senn per parteir davent da tgesa curt avant tgi en auto cun ena manaschunza cun prescha è sen veia.» Ed uscheia anavant. Pi spert tg’ia sung sen veia, vaia en Suzuki Swift avant me. Ed i para a me tgi els mettan aposta igl tempomat sen «Schneckenpost». Scu schi pansessan: «Ah, la Baltermia-Guetg! Chella è puspe eneda parteida mengia tard ed ò ossa stress, vot deir, ella ò angal ple set minutas per neir a Suagnign. La dagn ensatge taimp per sa chiettar e relaxar.» Ed uscheia vo mies viadi da Salouf a Suagnign mai angal set minutas, mabagn adegna diesch u anc daple. Displaschevlamaintg ò mies tscharvi anc betg registro chegl, ed uscheia è chegl igl muteiv tg’ia reiv adegna mengia tard.

En de da premaveira cun carar sur igl Pass digl Gelgia, antupond adegna puspe en Swift davos ena stierta, am vaia perfign imagino l’istorgia, tgi manaschunzas e manaschunzs da Suzuki Swift appartignan forsa ad ena associaziun secreta e misteriousa cun en intent pi profond. Ma tgenegn? E forsa ègl er simplamaintg persungas tgi painsan: «Pertge catscher? Nous vagn bagn taimp avonda ed ena infrastructura da veias perfetga tgi nous galdign abundantamaintg.»

Sandra Baltermia-Guetg veiva cun sia famiglia segl agen bagn puril a Salouf.