Sa «levgiar» en la mar – go ubain no-go?

Cun questas chaudas temperaturas durant la stad essas forsa era Vus returnads bellas embrinidas ed embrinids da Vossas vacanzas. Forsa dentant era cun in zichel nauscha conscienza?

A tutta via – e per esser sincer – a tgi da Vus n’è il suandant betg era ina giada gia capità: Gist curt suenter il sigl rinfrestgond en la mar, realisais Vus che atgnamain stuessas ir a far in pisch? E lura la dumonda evidenta, duess jau uss propi vegnir ora e chaminar tut quel toc tras il sablun chalira enfin tar las tualettas, ubain simplamain largiar il pisch en l’aua?

Sche Vus avais decidì per la segunda opziun, alura na stuais betg avair vargugna. Far il pisch en l’aua è tuttafatg en urden! Quai almain tenor in studi da la societad americana «ACS», ina da las pli grondas societads scientificas en il champ da la chemia.

En quest studi rendan scienziads attent primo ch’il pisch consista – sper concentraziuns da natrium e clorid – per la pli gronda part ord aua. Radund 95 % per esser correct. Secundo, il pisch è vairamain mo in pitschen «squitet» en la vastadad da noss oceans. E cun quel «squitet» agiunteschian ins nagut che na sa chatta betg tuttina gia en l’aua. Terzio, era tut ils animals da la mar fan pisch. Per exempel la balena blaua cun radund 970 liters urin per di.

Pia, svidai Vossa vaschia e nudai la proxima giada cun tutta calma vinavant! Vus contribuis perfin ad engraschar la mar. Dentant adatg, quai vala natiralmain mo per il pisch e per auas pli grondas.