Da bes-chas rapazas grondas, colliaziuns da tren sur cunfin ed il preventiv 2027
La conferenza dals presidents da la Regiun Engiadina Bassa/Val Müstair s’ha radunada d’incuort. I’l center es statta la rolla dal Parc Naziunal Svizzer i’l trattamaint da bes-chas rapazas grondas, las colliaziuns da trafic sur cunfin sco eir il preventiv.
Ils presidents da la Regiun Engiadina Bassa/Val Müstair (EBVM) s’han radunats als 20 avuost 2026 per la prüma jada extra muros a Müstair. La conferenza ha tractandà tanter oter la rolla dal Parc Naziunal Svizzer (PNS) i’l trattamaint da bes-chas rapazas grondas. Il directer dal PNS Ruedi Haller ha preschantà in quist’occasiun il program da lavur «PNS e bes-chas rapazas grondas». Quel s’occupa impustüt da l’observaziun e da la perscrutaziun da bes-chas rapazas grondas sco eir da la dumonda che rolla cha’l PNS po surtour in quist sectur tematic.
Ingün effet da protecziun supplementar
Da la comunicaziun als mezs d’infuormaziun resulta, ch’illa discussiun saja gnüda tematisada la situaziun speciala dal territori intuorn il Parc Naziunal sco eir l’importanza d’üna comunicaziun tampriva e transparenta tanter PNS, regiun e cumüns pertocs. La conferenza dals presidents ha constatà chi nu das-cha dar our dal program da lavur ingün effet da protecziun supplementar per bes-chas rapazas grondas dadour il Parc Naziunal. Al listess mumaint dessa gnir examinà, co chi’s po resguardar la situaziun speciala da la regiun pro la regulaziun da bes-chas rapazas grondas.
Brich üna colliaziun da transit internaziunala i’l center
Davo divers ons es la conferenza dals presidents darcheu entrada illa discussiun davart la colliaziun da viafier Scuol – Mals e s’ha laschada infuormar davart il stadi actual dal proget «Alpenbahnnkreuz Terra Raetica». Tenor la comunicaziun a las medias s’haja pudü far progress pro’l paket d’ingrondimaint Ramosch – Mals. La varianta Scuol – Mals vain priorisada invers la viafier dal Reschen.
Sco cha’ls respunsabels da la Regiun EBVM scrivan, nu stetta per la regiun üna colliaziun da transit internaziunala i’l center. Cha prüma priorità haja l’amegldramaint da l’avertüra fina regiunala e sur cunfin. La populaziun e’ls giasts dessan pudair as mouver a l’intern da la regiun sco eir sur ils cunfins in möd svelt, fidà e na cumplichà. Cha i’l center stettan perquai colliaziuns concretas e meglders attachs chi s-chaffischan ün nüz direct per la regiun e sia populaziun.
Colliaziun in direcziun Landeck
Pür in seguonda priorità dessan gnir perseguitadas colliaziuns da viafier internaziunalas a lunga vista. Cha lapro nu das-cha gnir negletta impustüt na üna pussibla colliaziun in direcziun Landeck. Quella dess gnir examinada eir our da vista da la regiun. Cha’l böt stopcha esser üna colliaziun plü buna pussibla da las vals e regiuns circundantas.
La conferenza dals presidents spetta implü cha la regiun gnia integrada adura ed activmaing pro’ls ulteriurs discuors politics e planisatorics dal Chantun cullas regiuns e pajais cunfinants. Ch’üna colliaziun da viafier internaziunala saja per la regiun be lura d’interess, sch’ella maina ün nüz concret da trafic, turistic e da l’economia publica ed amegldrescha al listess mumaint l’avertüra fina regiunala.
Adattaziuns realisadas pro l’Uffizi da scussiun e fallimaint
La conferenza dals presidents da la Regiun EBVM ha implü approvà unanimamaing il preventiv 2027. Pro sortidas da 5,46 milliuns ed entradas da 3,05 milliuns francs resulta ün surplü d’expensas a charg dals cumüns da 2,41 milliuns francs. Quel es var 4 % suot il preventiv 2026 respectivamaing 1 % sur quel dal quint 2025.
Cun l’approvaziun dal contrat da transferimaint da facultà tanter il circul da register fundiari da fin qua e la regiun vain ultra da quai terminada l’integraziun da l’uffizi fundiari chi’d es gnüda fatta pels 1. schner 2026 eir in reguard al dret da facultà.
In connex cullas masüras ordinadas dal güdisch superiur sco autorità da survaglianza pro l’Uffizi da scussiun e fallimaint han pudü gnir realisadas i’l fratemp las adattaziuns necessarias. Impustüt sun gnüdas realisadas las masüras da fabrica necessarias per garantir la sgürezza, il secret d’uffizi e la protecziun da datas. Tenor comunicaziun a las medias piglia la conferenza dals presidents cun plaschair cogniziun cha prescripziuns correspundentas sajan cun quai accumplidas.
Gust da leger dapli?