«Nezegiar pli consequent las schanzas»
L’emprema equipa dil Club da ballapei Trun/Rabius ei partida cun ina victoria e duas terradas el campiunadi da ballapei dalla 3. ligia. «Cun nezegiar las schanzas pli consequent havessen nus saviu recaltgar in punct ni l’auter dapli», di il trenader Claudio Bundi. Tonaton eis el cuntents culla prestaziun dall’equipa d’entochen ussa ed ei optimists per questa stagiun.
0:2 encunter Triesenberg, 4:1 encunter Uznach e 0:1 encunter Rapperswil-Jona. Cun treis puncts recaltgai els emprems treis giugs schai l’emprema equipa da Trun/Rabius sil 10avel respectiv il tierz davos plaz dalla gruppa 1 dalla 3. ligia. Oz, gievgia absolva la squadra dil trenader Claudio Bundi il giug dalla secunda prerunda dil Cup svizzer ordeifer encunter Bischofszell. Sco Trun/Rabius ei era Bischofszell in’equipa da 3. ligia. Silsuenter cuntinuescha il campiunadi per la squadra sursilvana ils 12 da settember 2026 culla scuntrada ordeifer encunter Sargans. «Sargans ei ina fetg bun’equipa. Quei muossan ils resultats dalla stagiun passada e dils emprems giugs da quest atun. Quei giug ordeifer vegn ad esser ina sfida per nus», di Claudio Bundi.
Nezegiar las schanzas
«Els giugs encunter Triesenberg e Rapperswil-Jona che nus havein spiars, havessen nus saviu recaltgar in ni l’auter punct. Encunter Triesenberg ch’ei per mei il favorit en quella gruppa, havein nus dominau il giug duront 50 minutas. El giug encunter Rapperswil-Jona survegnin nus il gol decisiv en nossa disfavur ellas davosas minutas», resumescha Claudio Bundi las duas scuntradas che Trun/Rabius ha spiars. El giug encunter Uznach seigi sia squadra stada consequenta enten nezegiar las caschuns avon il gol digl adversari. «Sche nus nezegein nossas schanzas, lu gudignein nus ils giugs. Nus stuein esser pli consequents, lu havein nus il success», accentuescha Claudio Bundi che trenescha l’emprema equipa da Trun/Rabius il quart onn.
Equipas fetg ulivas
Per Claudio Bundi ha la gruppa 1 dalla 3. ligia era uonn ina buna qualitad: «Tenor miu manegiar ein las 12 equipas aunc pli ulivas questa stagiun. Encunter quellas savein nus sittar gols, mo savein era survegnir els. Cun auters plaids: Sche Ti sietas buc ils gols, lu spiardas ils giugs. Da l’autra vart havein nus era la qualitad da batter mintgin da quels adversaris.» Gest pervia da quei seigi ei grev da far ina prognosa per la stagiun currenta: «Mia finamira ei da sviluppar tecnicamein vinavon l’equipa. Jeu giavischel in ballapei culla balla e buc in da cumbat.» In’autra finamira seigi d’integrar ils giuvens. Plirs juniors A vegnan risguardai en in giug ni l’auter era questa stagiun. «Da principi havein nus dau ina buna runda da primavera. Jeu less cuntinuar cun quella quest atun», di Claudio Bundi.
Cader cun 20 giugadurs
L’emprema equipa da Trun/Rabius dumbra 20 giugadurs. «Sche nus havein buca blessai, ei quei in bien diember», di Claudio Bundi. Blessai ein il mument treis giugadurs, dus gia dapi rodund in onn. Da niev el cader ei Maico Elia Lutz. La media da vegliadetgna dalla squadra plaida per in bien avegnir. «Cun excepziun da singuls giugadurs havein nus il mument ina media da vegliadetgna da rodund 22 onns», di Claudio Bundi. Sia finamira primara dalla stagiun currenta ei da setener ella 3. ligia: «In rang final el miez dalla tabella ei segiramein ina sfida, mo era pusseivel.» La stagiun vargada ha Trun/Rabius terminau il campiunadi da ballapei dalla gruppa 1 dalla 3. ligia sil siatavel plaz, pia amiez la tabella cun 12 equipas. Dil reminent: El Cup grischun ha Trun/Rabius battiu Cuera 97 ordeifer cun 4:1 – medemamein in’equipa da 3. ligia – ed ei ussa el quart-final.
Gust da leger dapli?