Vendemia anticipada, ma buna
Dapi passa 20 onns fa Aron Candrian cun sia famiglia vin. Pertge che las vignas possian vertir pliras stads da chalira, tge ch’el fa per esser pront per il futur e co che la racolta 2026 vesa ora – tut quai raquinta il viticultur tar ina visita da RTR en sias vignas a Fläsch.
Blers dis chauds ed ina sitgira han occupà durant la stad 2026 l’agricultura svizra. Era la viticultura grischuna ha stuì s’adattar. A Fläsch per exempel ha la vendemia lieu almain duas emnas pli baud ch’usità. Uschia possian ins evitar che l’iva daventia memia dultscha pervi da la chalira, di Aron Candrian vers RTR: «La chalira augmenta la cumpart da zutger en las ivas e quai attira vespras che donnegian las ivas.» Cun ina vendemia anticipada possian ins evitar donns pli gronds. Las vespras restian però stentusas per voluntarias e voluntaris che gidan en la vendemia, di il viticultur oriund da Sagogn che cultivescha cun sia famiglia vignas en Spagna ed en divers lieus grischuns, tranter auter a Fläsch. La racolta saja sumeglianta a quella da l’onn 2025 (guarda era boxa). Qualitad e quantitad satisfetschian: «I dat forsa schizunt dapli iva che l’onn passà.»
Vignas giuvnas versus vignas veglias
Els hajan stuì dar be a las vignas giuvnas aua, declera Aron Candrian. Quellas sajan creschidas pli pauc che spetgà e per part era vegnidas magliadas da lieurs. Las vignas veglias, che han per part passa 40 onns, sajan percunter robustas. Grazia a las ragischs profundas possian ellas era surviver pliras stads da chalira. «A las vignas veglias na dain nus mai aua. Nus schain adina ch’ivas e chauras verteschan temperaturas fitg chaudas», palaisa il viticultur.
Preparaziun per la midada dal clima
Ch’i po en il futur dar dapli stads chaudas, sa era la viticultura grischuna. Aron Candrian cultivescha en emprima lingia Riesling Sylvaner e Pinot Noir. Collega-viticulturs experimenteschan però cun autras ivas ch’èn pli resistentas a la chalira.
Era sin las parcellas dad Aron Candrian pon ins observar mesiras per in futur chaud. Tranter las vignas creschan dapi curt ulivers, mandlers ed apricosers che duain en futur procurar per sumbriva leva e retardar il process da madiraziun. En connex cun las ervinas duain las diversas plantas era rinforzar la resistenza. «Cun ina biodiversitad pli auta avain nus ina resilienza pli auta da las vignas», declera Aron Candrian e resumescha: «Per ulteriuras stads da chalira essan nus pronts.»
L’experta quinta cun ina fitg buna qualitad
La sommeliera ed experta da vin Faye Köhler quinta cun ina fitg buna qualitad dal vin 2026. Cunzunt en la regiun dal Signuradi. D’engraziar è quai per l’ina a las temperaturas chaudas da questa stad, uschia che las ivas han survegnì in aroma intensiv. Per l’autra ch’i n’era betg memia bletsch. Perquai han las ivas era gì da cumbatter pli pauc cun marscha e miffa.
La chalur po era daventar in privel
Pervi da la chalira èn las ivas bain stadas madiras pli svelt, entras quai dentant restadas pli pitschnas che uschiglio, uschia che la quantitad è pli pitschna quest onn. Las temperaturas chaudas procuran bain per in bun gust, pon dentant er esser in privel per las vignas, sco che Faye Köhler declera envers RTR: «La chalira po natiralmain era brischar la feglia e las ivas. Ils viticulturs ston era dar adatg cura e co dar aua.» Per cletg sajan las vignas plantas fitg intelligentas e sappian laschar crescher lur ragischs spert pli profund per uschia chattar aua, uschia l’experta ch’è gia dapi il 2012 sommeliera ed ha in bachelor en scienza da vin. «Ina maxima da sommeliers è: Pli fitg che la vegna sto patir e meglier ch’ella è», manegia Faye Köhler. Cunzunt las sorts Pinot Noir e Chardonney che creschan en il Signuradi sajan spezialmain robustas e dettian ina fitg buna qualitad quest onn.
In vin per las annalas
A la dumonda co quest vin da quest onn vegnia lura era propi a gustar en il magiel, di Faye Köehler: «Ins vegn segir a sentir la stad en quest vin. In vin nua ch’ins senta ora l’intensitad da l’iva.» Sche quai è lura era propi uschia, vegn a mussar la primavaira 2027, cura ch’ins po degustar il product final. La prognosa empermetta gia fitg bler. La sommeliera è schizunt persvadida ch’il vin 2026 giaja en las annalas sco fitg bun vin. (rtr/fmr)
Gust da leger dapli?