Il Center da Sandà Engiadina Bassa survain il premi dal public

In gövgia passada sun gnüts comunichats a la surdatta dal Prix Montagne 2026 a Berna ils victurs. Il premi principal dotà cun 40 000 francs va ingon l’impraisa Freelap da Fleurier (NE). Quella prodüa apparats per masürar il temp in differentas disciplinas da sport. Quai ha scrit l’Agüd svizzer per la muntogna in üna comunicaziun. Quel surdà insembel cun l’organisaziun Gruppa svizra per las regiuns da muntogna daspö l’on 2011 quist premi. Eir duos progets grischuns d’eiran nominats pel Prix Montagne 2026: il Center da Sandà Engiadina Bassa (CSEB) a Scuol e l’interpraisa da bischutaria Dolceperla Gioielli da Poschiavo. Fingià la nominaziun per quel premi es ün grond success pels progets. Our da totalmaing 42 progets da l’intera Svizra ha la giuria tschernü be ses progets finals. Il CSEB ha a la fin amo guadagnà il premi dal public dotà cun 20 000 francs.