Pneus isai e reparaturas cun pupi da cola

Ils 27 da schaner 2026 hagi il CEO dall’AutoDaPosta SA, Stefan Regli, survegniu ina brev urgenta dils collaboraturs e dallas collaboraturas dall’interpresa en Surselva. Sco la revista Beobachter rapporta en in artechel da Stefanie Hablützel, seigi oravontut vegniu criticau il stan dils autos da posta. Ins seigi carrai duront meins cun autos che seigien stai defects ed ins hagi reparau donns provisoricamein cun pupi da cola.

42 persunas han suttascret la brev – in tierz dil persunal en Surselva. La situaziun seigi «il resultat da decisiuns fallidas ella centrala, da mirar sistematicamein dalla vart e d’ina organisaziun che laschi adina pli fetg la basa persula».

Il schef pren posiziun

Treis jamnas suenter la brev ha Stefan Regli priu posiziun ed admess ch’ils vehichels presentien per part maunghels. El ha annunziau mesiras per stabilisar il stan da quels e pass per pass migliurar el. Pervia dil grond diember da defects vegnien «defects buca relevonts per la segirtad» denton tolerai temporarmein.

Auter vesa quei il manischunz Daniel Schmid ch’ei s’annunziaus tier il Beobachter cun sias observaziuns. Ins hagi era tolerau defects relevonts per la segirtad. El hagi denter auter constatau vid siu auto da posta ch’ils pneus d’unviern eran isai ed ei haveva en in liug in donn ch’ins veseva il garter da metal sut il gummi dil pneu. Cura ch’el seigi ius ella garascha a Glion per mussar il defect, hagi ei giu num ch’ei detti negin auto da reserva e ch’il pneu seigi gia vegnius annunziaus avon plirs dis d’in auter manischunz.

Daniel Schmid ha lu entschiet a documentar ils donns cun fotografias ed ha dumandau il fenadur ses schefs, tochen cura ch’ei vegni fatg enzatgei «encunter quei stan prigulus». Els carreschien duront liung temps «cun problems dils freins, dils motors e dall’electronica».

La risposta dil responsabel regiunal pils vehichels seigi stada: da principi hagien ins avunda autos da reserva en Surselva. Ei detti denton denter auter problems culla vegliadetgna dils autos ed «extrem biars donns pervia da manevers malprecauts». Ei drova «in tec temps» per curreger quei.

Buc in cass singul 

Plirs collaboraturs e collaboraturas dalla AutoDaPosta SA han rapportau enviers il Beobachter da schabetgs semeglionts sco el cass da Daniel Schmid: Il post da direcziun hagi repartiu vehichels, che seigien gia vegni annunziai sco buca carrabels, ad auters manischunzs per evitar ch’ina lingia crodi ora – e quei senza reparatura.

La revista Beobachter ha presentau quels cass all’interpresa AutoDaPosta SA. Pertuccont il cass dil pneu defect scriva l’interpresa ch’il «defect relevant per la segirtad» seigi buca documentaus cumpleinamein: «Per cass che quei vehichel ei propi vegnius duvraus, corrispunda quei buc a nossas prescripziuns.» E concernent las renfatschas ch’il post da direcziun hagi schau carrar vehichels defects, scriva l’interpresa ch’ins sappi «buca suandar ils cass els sistems sin fundament da las indicaziuns».

L’interpresa accentuescha enviers il Beobachter che la segirtad hagi adina prioritad. Sch’ei detti dubis davart la segirtad dil vehichel, astgien ins buca duvrar quel, era sch’il viadi sin quella lingia croda naven. Ils manischunzs e las manischunzas ein responsabels: «Els decidan avon che far il viadi, sch’il vehichel ei segirs. Sche quei ei buc il cass, astgan ins buca far il viadi.»

17 manischunzs han visau plazza

Ils davos 12 meins han 17 manischunzs visau la plazza. Tenor las reproschas seigien era las cundiziuns da lavur in problem, denter auter cun temps da preschientscha da tochen 13 uras, nua ch’ina veta da famiglia seigi nunpusseivla (mirar era La Quotidiana dils 3 da settember 2026). Quei confirmescha l’interpresa ed accentuescha ch’ins hagi instradau mesiras. Denter auter seigi la planisaziun da persunal puspei a Glion e dapi il zercladur lavuri puspei in responsabel per vehichels a Glion. Ils manischunzs semuossan enviers il Beobachter «precautamein positiv». In dad els ha il sentiment che la situaziun semidi. Ei resti denton ina gronda sfida.

Igl artechel davart ils autos da posta defects ella revista Beobachter da Stefanie Hablützel ei cumparius gievgia.