Ils Lamparts bandunan Morissen

Suenter prest sis onns bandunan Anni e Reto Lampart il menaschi gastronomic a Morissen che porta il num dils consorts enconuschents sco ustiers e cuschiniers da num e pum. Quei confirma il possessur digl anteriur hotel Mundaun da Morissen, Simon Osterwalder. «Ei constat, la fin settember siara il Lampart’s Gasthouse e Country Club.»

Buca forsa perquei che la purschida dils dus gastronoms fuss buca stada appreziada, sco quei che Simon Osterwalder puntuescha. «Suenter sis onns enqueran Anni e Reto Lampart semplamein ina nova sfida.» Co ei va vinavon cugl anteriur hotel Mundaun che Simon e Tania Osterwalder han cumprau e renovau avon beingleiti diesch onns sa Simon Osterwalder aunc buc. «Igl ei buca da donn da far ina pausa per ponderar co ed en tgei fuorma cuntinuar.» Simon Osterwalder ei perschuadius ch’ei vegni er a dar el futur ina purschida egl anteriur hotel Mundaun a Morissen.

Concept da menaschi

Il Lampart’s a Morissen era gia da bial’entschatta enconuschents per siu concept da menaschi. La plipart dalla purschida da wellness, ustria e star surnotg ei reservada a commembers digl aschinumnau «Country Club». Cun ina contribuziun annuala da 5000 francs han ils commembers da quei club access exclusiv buca mo alla exquisita cuschina dils conjugals Lampart.

La casa ha ultra da quei purschiu albiert e habitaziuns da vacanzas. Simon Osterwalder ei perschuadius ch’ei seigi reussiu grazia al Lampart’s da carmalar clientella en Surselva che havessi schiglioc buc exnum anflau la via en Lumnezia. Dalla impurtonza da quei fatg ei igl advocat da Turitg cun sedia secundara en Lumnezia secapescha pertscharts. Simon Osterwalder presidiescha numnadamein il cussegl d’administraziun da Surselva Turissem e s’engascha era en quei grau per il turissem sursilvan.

Che la purschida gastronomica en Surselva ha magari fadigia dad anflar e da tener ustieras ed ustiers ei era buca stau tschelau al president dil cussegl d’administraziun da Surselva Turissem. El numna per exempel Lucian Alig che ha annunziau da bandunar l’Ustria dalla Posta a Vrin la fin october 2026. Simon Osterwalder ei buc il sulet che deplorescha quella decisiun e la sperdita dad ina purschida gastronomica entadem la Lumnezia. Che quellas purschidas ein impurtontas buca mo ord vesta turistica ei il president da Surselva Turissem cunscients.

Era per quei motiv eis el antruras sedecidius da s’engaschar a favur dalla ustria Mulin a Morissen. Ina ustria purtada dad ina societad acziunara. Simon Osterwalder appellescha denton era alla populaziun indigena e quei ad emprems sco a secund habitonts en Surselva. «Ei gida pauc da selamentar ch’ei marschi nuot en Surselva e da l’autra vart buca nezegiar la purschida ch’ei avon maun.»

Dapli success en Stussavgia

Far dad ustieras ed ustiers pretenda ina liunga preschientscha el menaschi. E gest en territoris turistics sebrattan ils temps cun dabia lavur cun temps nua ch’ei marscha pauc ni nuot regularmein. Aschia che l’attractivitad dalla clamada gastronomica pitescha el temps nua ch’igl equiliber denter lavur e temps liber ei impurtonts.

Mo ei reussescha era adina puspei da segirar la cuntinuaziun dad ustrias. Sco per exempel en Stussavgia, nua ch’igl avegnir dallas duas impurtontas ustrias dalla val eran aunc avon dus onns fetg incerts. Sco quei ch’il president communal, Lukas Züst, declara seigi ei reussiu al possessur dallas duas ustrias d’anflar novs ustiers. «Quei ei secapescha fetg impurtont per nossa val.» Lukas Züst conceda denton ch’ei hagi bein dau discussiuns ella val principalmein pertuccond il temps d’avertura dalla ustria Rathaus a Safien-Platz. «Ella siara la sera gia dallas nov e quei plai buc a tuts.» Per il president dalla vischnaunca Stussavgia dat ei denton buca dabia da tulanar. «Pli bugen ina ustria che siara dallas nov che negina ustria.»