Musica per siemiar dals frars Gutiérrez

«Hermanos Gutiérrez» è in duo cun ghitarras che fa musica instrumentala. La furmaziun è vegnida fundada da l’onn 2015 dals dus frars Estevan ed Alejandro Gutiérrez a Turitg. La mamma è ecuadoriana ed il bab svizzer, els sun creschids si tranter auter a Zofingen ed a Turitg. Estevan ha fatg il studi da ghitarra classica , ses frar Alejandro ch’è otg onns pli giuven a emprais a sunar l’instrument autodicaticamain. Ils Hermanos Gutiérrez fan cun lur ghitarras musica senza chant. Lur stil collia musica folcloristica da l’America Latina cun musica da rock, tranteren er elements da musica psicadelica dals onns 1960 e da la musica da italo-westerns, inspirada p.ex. dad Ennio Morricone. Ils frars han cumenzà da l’onn 2015 a sunar ensemen. Lur emprim album «8 Años» han els publitgà sco atgna producziun per lur famiglias. Els dattan concerts sin tut il mund, tranter auter han els sunà era al Festival da Jazz a Montreux. A mai plascha lur musica fitg bain, igl è ina musica quieta (che quieta era) cun titels per gronda part spagnols, p.ex. «Hijos Del Sol», «El Camino De Mi Alma», «Cerca De Ti», tranteren era englais «Western Bronco» u «Low Sun». Emprender a conuscher lur musica pon ins bain cun tadlar ils «Essentials» da Hermanos Gutiérrez, quels dattan ina buna survista da lur musica. Ils 25 da settember da quest onn cumpara in nov album dals dus frars Gutiérrez. Sco ch’els ditg en in’intervista resguardan els la Svizra anc adina sco lur vaira patria.