Cun Caminada, Arpagaus e Giger
Bunamain in banchet è adina la Fiera da daletg a Farschno organisada dal star-cuschinier Andreas Caminada. Er ier dumengia èn ils gourmets vegnids en rotscha, radund 5000 dad els.
L’emprima dumengia da settember tutga a Farschno tar ina da quellas, cur che la pli pitschna citad dal mund daventa in lieu cun var 5000 persunas. La raschun è che Andreas Caminada, in dals megliers cuschiniers da la Svizra envida a la Fiera da daletg, en tudestg al «Genussmarkt».
Tar quest’occurrenza culinarica s’inscuntra l’elita naziunala da cuschiniers e cuschinieras. Ils gourmets che derivan da lunsch e da manaivel han ina schelta da tratgas sco tar in restaurant da la classa superiura. Quai ch’è vegnì servì era lura da qualitad perfetga, dal gust ina delicatessa, da las spezarias aromaticas e dal preschentà er insatge per l’egl.
Tut en tut in’aventura culinarica, nua che puncts da Gault Millau e stailas da Michelin s’uneschan cun procurar per la crema da la crema da cuschiniers e cuschinieras per il cuntegn da la fiera da daletg. Els ed ellas cuschinan gist al lieu.
130 000 tocs capuns
Per la segunda giada da la partida a la Fiera da daletg è stà il cuschinier Linus Arpagaus da la «Casa Casutt» a Glion. En il Grischun tutga el tar in dals megliers cuschiniers e quai gia dapi passa 20 onns. Cun sia cuschina fina è el er adina da chattar en l’ediziun dal «Gault Millau». L’onn passà ha el survegnì dals experts 15 puncts.
A Farschno a la fiera da daletg ha Linus Arpagaus servì in «tatar» da muvel gross. 40 kilos charn haja el duvrà per far la tratga. Il «tatar» era ina buntad e d’excellent gust.
En colonna steva la glieud sco adina tar l’occurrenza per gourmets e mangiabain tar il stan dad Annalisa Giger dal hotel restaurant Alpsu a Mustér. Ella dastg’ins numnar cun buna raschun la «regina dals capuns». La cuschiniera ed ustiera fa en in onn 130 000 capuns, ella ch’è enconuschenta lunsch sur ils cunfins da la Surselva, gea dal Grischun surtut pervi dals capuns, fins, da bun gust e delicats. Servì ha ella ils capuns cun in buglion frestg, cun chaschiel sgarà, e mancà n’ha er betg il bler paintg culà.
69 puncts «Gault Millau» en in culp
Envida in star sco Andreas Caminada a la fiera da delicatessas, alura suondan era ses amis e stars cuschiniers a l’invitaziun. In da quels è Silvio Germann, in anteriur cuschinier dal «Schauenstein» d’Andreas Caminada. El ha servì charn-portg stagliada cun ina marinada levamain recenta enritgida cun schensch, che ha dà a la tratga il gust spezial.
In «hotdog» grischun
Hansjörg Ladurner dal «Scalottas Terroir» a Lai ha preparà per ils blers giasts in «hotdog grischun» – ina liongia da charn-nursa servida en in paunin da spelta e suren sdrimas da colrava e cucumera da lev gust asch. «Grond kino» era il dultsch servì dal team dal restaurant «Igniv» a Turitg, in restaurant da 17 puncts «Gault Millau».
Ma era tut ils products ch’i deva da cumprar a la fiera, products spezials, quai davent da vinars fin tar vin, da glatsch fin tar pastizarias e da spezarias fin tar salmun èn stads d’auta qualitad.
Gust da leger dapli?