En colonna anavos en stalla
Las varga 100 vaccas che han passentau la stad sill’alp Stavonas/Prada ein turnadas la sonda vargada. La stad 2026 cun sia schitgira extrema ha giu per consequenza che la scargada ei stada empau pli baul.
Ella fetschi ussa 40 onns la pura, denton ina stad schi curiosa e miserabla sco quella hagi ei aunc mai dau, ha ina pura da Sursaissa manegiau. Ellas Alps vegn la stad 2026 probablamein ad ir ellas annalas dall’agricultura. Ton ils praus-casa, ils mises sco las pastiras d’alp han pitiu dalla schitgira.
Empau pli baul che planisau
Las pastiras brinas e senza arvadi han sfurzau da vegnir empau pli baul a casa culla muaglia. Suenter haver adempliu ils 90 gis obligatoris dil temps d’alpegiaziun ha la fumeglia bandunau ils stavels situai el nord dil péz Sezner.
Malgrad las circumstanzias ha il persunal d’alp preparau cun quitau ina scargada festiva. Sonda endamaun ha la squadra derivonta digl Allgäu rimnau las vaccas e decorau ellas cun tschupials da dascha, fluras, carduns e coclas. Sco quei che Silvan Darms, il cautegia da Stavonas/Prada, ha getg alla FMR, ei quella fumeglia stada la sisavla stad sill’alp da Flond e Glion.
Beneventau e fatg bravo
Allas 10.00 ei la muaglia arrivada en corda tras Vivèr/Affeier. Da leu ha la liunga colonna da 100 vaccas da latg, 15 vaccas-mumma e 10 vadials cuntinuau il viadi sil stradun e sur la punt da Valata. Punctualmein ei il til arrivaus a Flond, nua ch’in grond pievel ha beneventau e fatg bravo a muaglia e fumeglia. Pil persunal d’alp ed in triep gidonters ha la lavur cuntinuau.
El claus sper la via cantunala han els stuiu zavrar ils animals e surdar quels als possessurs. Naven dil claus grond han els catschau la biestga en claus separai ni cargar ella en camiuns pil transport pli lunsch.
Las alps Stavonas e Prada eran oriundamein duas alps vischinas cun duas caschadas separadas. Gl’onn 2013 han ils purs da Flond e Glion decidiu da fusiunar. Sco Silvan Darms ha getg vinavon alla FMR, ei quella mesira da lu secumprovada daferton.
Gust da leger dapli?