Il monolog dal cinicher

L’autur svizzer Charles Lewsinski (80) è in talent litterar universal. El è dramaturg, reschissur, autur e perfin scenarist da sitcoms. Sia pli frestga publicaziun litterara (2024) raquinta «Eine andere Geschichte». Atgnamain n’èsi betg mo ina singula istorgia, mabain in roman cun bleras istorgias ed anecdotas che Lewinski pachetescha en ina gronda istorgia – en ina biografia.

En il roman «Eine andere Geschichte» lascha l’autur zürigais repassar l’istorgia da vita da Curtis Melnitz. Quel raquinta gist sez sia entira istorgia, en furma dad in monolog. En sasez èsi in dialog «monologisà» tranter il producent da film Melnitz e ses psichiater. Mintga chapitel dal cudesch è ina sesida da psicoanalisa. Pelvair, i dat bler d’analisar en la vita dal client gidieu ch’ha vivì en l’emprima mesadad dal 20avel tschientaner. Resumà curt: Ses geniturs èn morts cura ch’el aveva tschintg onns, el è creschì si tar parents, è emigrà en ils Stadis Unids, ha fatg carriera en la branscha da film, ha fatg servetsch militar per l’America durant la Segunda Guerra mundiala, ha vis sgarschaivels maletgs en champs da concentraziun, ils Nazis han mazzà ina part da ses confamigliars e Melnitz è stà maridà pliras giadas … Insumma, igl è capità uschè bler en sia vita ch’ins po chapir che Curtis Melnitz è impregnà d’in cinissem che serra mintgatant la gula.

Il producent da film Curtis Melnitz ha propi vivì. Ins sa dentant pauc dad el. Sur set chantuns datti perfin colliaziuns cun la famiglia da Charles Lewinski, senza che quai vegniss tematisà en il cudesch. Ma apunta, co schess Curtis Melnitz en in tal cas al psichiater? – «Quai è in’autra istorgia.»