Malgrad gi naziunal – neginas acziuns
Sonda ha l’organisaziun naziunala Spitex Svizra fatg attent al gi naziunal dalla spitex. Biaras dallas 400 organisaziuns per la tgira ed assistenza a casa han mess in accent ed han organisau occurrenzas specialas da publicitad.
En Surselva ein treis organisaziuns publicas e pliras tgirunzas independentas associadas all’organisaziun tetgala naziunala. Ina dallas organisaziuns publicas ei la Spitex Selva. Ella ha festivau igl onn 2025 siu giubileum da 25 onns ed ei responsabla per la tgira ed assistenza a casa dallas habitontas e dils habitonts da Trin, Flem, Laax, Falera, Sagogn e Schluein.
«In impurtont player»
Suenter ch’ella ha festivau igl onn vargau siu giubileum cun numerusas acziuns, ha ella desistiu da separticipar uonn ad acziuns pil gi naziunal dalla spitex. Daniela Beeli e Petra Camathias, las duas co-menadras dalla Spitex Selva, han confirmau quei alla FMR.
Ellas han fatg attent al survetsch ed al provediment sanitar a casa cun ina communicaziun da medias. «Cun pli che 40 collaboraturas essan nus in impurtont player el provediment da sanadad ella regiun. Nus savein sustener e gidar persunas da tuttas gruppas da vegliadetgna da restar a casa, malgrad malsogna, accident, grevezias da vegliadetgna, maternitad ni limitaziuns», han las duas co-menadras dalla Spitex Selva, declarau. Tuttina sco las autras duas organisaziuns en Surselva, la Spitex Cadi e la Spitex Foppa, proveda era la Spitex Selva la populaziun culs survetschs sanitars a casa. El center seigi la situaziun individuala da mintga carstgaun. Communablamein culla persuna che cloma e giavischa agid, sclareschan las collaboraturas il basegn da sustegn. Finamira eis ei adina da mantener l’independenza dalla persuna e da promover che quella sappi restar a casa.
Gust da leger dapli?