Passa 100 participonts ein stai «activs a Glion»

Il program dalla sonda vargada ha cumpigliau ina gronda paletta d’activitads: sils fastitgs dil castur e dalla ludra el territori Isla Mulin Sut a Castrisch, la guida ellas Minas da Gulatsch sur Rueun, tips e trics sil Pumptrack a Glion, reiver liber (buldrar) a Schnaus entochen Line-Dance a Glion e la tura guidada cun E-Mountainbike entuorn il Mundaun.

Gronda resonanza ha era la siatavla etappa dalla Via Glion giu. La senda che meina da Riein sur il grep a Sevgein e vinavon a Castrisch e Glion ei vegnida cumpletada uonn cun novas tablas d’informaziun che intermedieschan per liung dalla senda fatgs historics e locals. L’occurrenza sezza ei naschida en connex cun l’elaboraziun dalla Via Glion ed accumpogna siu svilup dapi l’entschatta.

Cun tscheina communabla

Sco finiziun ein tut ils participonts s’entupai el bogn Fontanivas per la tscheina communabla ed il brat dallas aventuras dil di. Ils organisaturs tilan ina clara bilanza: «Aktiv a Glion» retrai cuntinuadamein in grond interess tier indigenas ed hosps. Ils davos onns ha l’occurrenza attratg mintgamai da quei da 100 persunas. Quei conferma l’impurtonza dall’occurrenza. Quella vegn purtada dall’uniun «a Glion» ed ha giu liug uonn per la tschunavla gada. La finamira resta da far veseivla la varietad dallas purschidas en ed entuorn las tredisch fracziuns dalla vischnaunca. La cuntinuaziun igl onn vegnent vala sco dada.