Duas ga na ed ina ga gie
La vischnaunca da Flem ha astgau suttametter la damonda da baghegiar per ina antenna dalla telefonia mobila ella tuor dalla baselgia da sogn Martin alla zona da planisaziun. E quei era sche la vischnaunca ha relaschau la zona pér suenter che la Swisscom ha tschentau la damonda da baghegiar. A quella conclusiun vegn la Dertgira superiura grischuna en sia decisiun dalla fin uost 2026. En duas autras decisiun curdadas e publicadas el medem mument che pertuccan antennas existentas ei la dertgira denton vegnida ad ina autra conclusiun.
Gest treis decisiuns ha la Dertgira superiura grischuna relaschau la fin uost 2026 che pertuccan la zona da planisaziun dalla vischnaunca da Flem relaschada miez avrel 2025. Quella zona da planisaziun ei vegnida relaschada cugl intent dad elavurar prescripziuns per plazzar antennas per la communicaziun cun telefonins sin intschess habitau dalla vischnaunca.
Tenor las decisiuns dalla dertgira astgan las antennas gia lubidas ed installadas sil baghetg dalla Posta ed ella tuor dalla baselgia sogn Giusep buca vegnir integradas ella zona. Auter ha la dertgira denton decidiu en connex cun la damonda da baghegiar per ina antenna ella baselgia sogn Martin. Quella damonda astga la vischnaunca integrar en quella zona da planisaziun.
Recuors e petiziun
Il fenadur 2024 ha la Swisscom inoltrau ina damonda da baghegiar per construir ina antenna per la telefonia mobila ella baselgia sogn Martin a Flem. Encunter la damonda da baghegiar dalla Swisscom ha ei dau sin palancau communal buca mo otg recuors, mobein era ina petiziun cun bia bein 400 suttascripziuns. El center ton dalla petiziun sco dils recuors ei buca sulet stada la pretensiun da buca dar neu il clutger dalla baselgia da sogn Martin per realisar ina antenna dalla telefonia mobila. Recurrentas e recurrents sco la petiziun han pretendiu dalla suprastonza communala da definir ils loghens adattai per antennas sin intschess communal.
Swisscom versus vischnaunca
Cugl intent dad elavurar prescripziuns pertuccont indrezs dalla telefonia mobila sigl intschess habitau dalla vischnaunca da Flem ha la suprastonza communala relaschau ina zona da planisaziun miez avrel 2025. La vischnaunca ha era suttamess la damonda da baghegiar dalla Swisscom dil fenadur 2024 a quella zona da planisaziun.
Per displascher dalla Swisscom che ha inoltrau in recuors alla Dertgira superiura grischuna il fenadur 2025 cun la pretensiun che la damonda da baghegiar il fenadur 2024 stoppi vegnir tractada. En siu recuors ha la Swisscom dad ina vart fatg valer che l’antenna previda sil clutger baselgia seigi buca visibla ed aschia sappi ella era buca disturbar il maletg dil vitg e dalla cuntrada. La Swisscom ha denton era renfatschau alla vischnaunca da haver relaschau ina zona da planisaziun cun igl intent da buca stuer tractar la damonda da baghegiar. La Swisscom ei dil meini che la vischnaunca da Flem havessi buc astgau suttametter la damonda da baghegiar digl onn 2024 retroactivamein in onn pli tard ella zona da planisaziun.
Dau raschun alla vischnaunca
En sia decisiun dalla fin uost 2026 scriva la dertgira che las leschas grischunas enconuschien neginas prescripziuns ch’impedeschien da suttametter damondas da baghegiar aunc buca tractadas ad ina zona da planisaziun. Midadas legalas relaschadas duront il temps da tractar ina damonda da baghegiar stoppien vegnir risguardadas. «La zona da planisaziun ei aschia ina midada legala», constatescha la dertgira. Ella vesa era ellas decisiuns dalla Dertgira federala negins impediments per igl agir dalla vischnaunca da Flem. Consequentamein renviescha la dertgira superiura grischuna il recuors dalla Swisscom ed adossescha ad ella ils cuosts dalla procedura. Per las antennas existentas el baghetg dalla Posta ed ella tuor dalla baselgia da sogn Gion haveva la Swisscom medemamein inoltrau ina damonda da baghegiar il schaner 2025. Quellas damondas pertuccan denton sulet midadas vid ils indrezs existent e gia lubi avon onns. Il motiv principal per la Dertgira superiura che quellas duas damondas astgan buca vegnir suttamessas alla zona da planisaziun e ston vegnir tractadas.
La populaziun ei dumandada
Sco quei ch’il president communal Christoph Schmidt gi ha la vischnaunca daferton publicau in sboz per ina lescha che sefatschenta cun las reglas communalas da plazzar antennas dalla telefonia mobila sin intschess dalla vischnaunca. «Las cumpetenzas communalas en quei grau ein denton fetg restrenschidas», gi Christoph Schmidt. La populaziun da Flem ei envidada da s’exprimer davart las propostas per ina lescha communala publicada silla pagina dalla vischnaunca.
Aschia che la damonda sche la tuor dalla baselgia da sogn Martin retscheiva in gi ina antenna ei era grazia alla decisiun dalla Dertgira superiura e la zona da planisaziun aunc gitg buca giud meisa.
Gust da leger dapli?