In beinvegni agl atun cun fiera e scargada

Strusch che la fiasta d’atun da Sagogn ha entschiet sonda endamaun, ferdava ei schon da paun frestg, dultschergnem ed ieli da barsar. Ch’ins stoppi pitir fom ni seit, ei buca stau da temer. Per quei han denter auter l’Uniun da musica Sagogn cun gril e frittera ni era la societad cooperativa «Pistrin Casut» cun pizzas procurau.

Dalla fiera el quatier Casut ein ils hosps denton buca mo i cun in bien fundament a casa. L’ina ni l’auter ei era turnaus cun in niev cristal, fluras, vischala, mobigliettas da lenn ni autra rauba da tutta sort.

Divertiment per pign e grond

Sco usitau ha era il program accumpignont envidau da passentar la sonda a Sagogn. In clown, in stan da sminca, giugs ed in teater da marionettas han divertiu ils hosps pli pigns. Pils pli gronds han la band «K!ss Me» ed il «DJ Shabizz» concertau. E pils sportivs – ni quels che vulan daventar sportivs – ha il Selva Club Sagogn envidau ad in trenament da fuffergnadi. Cu ei hagi buca neiv, mondien els a cuorer, cun velo ni cun skis cun roda, aschia ina commembra dil club da cuorsa liunga.

La scargada sefa udir

Il punct culminont dalla fiasta d’atun ei denton sefatgs udir cuort suenter las 14.00, cu puras e pasturs ein turnai cun rodund 50 vaccas dall’Alp Sogn Martin. A Sagogn ha la scargada fatg ina runda el Vitg dado e carmalau cun sias stgellas e tschupials da star spalier. Sco il cautegia Gion Beeli ha confirmau enviers la FMR, seigi quei denton mo stau las vaccas schetgas. Cullas vaccas da latg seigien ei schon turnai entschatta settember.