Ina Nossadunna sin visetas en claustra

La Nossadunna dalla caplutta da s. Valentin a Mumpé Medel ha fatg ina viseta a Mustér. El rom dils Dis europeics dil patrimoni ei ella vegnida presentada venderdis sera ella baselgia claustrala. Quei en in ambient per aschidadir familiar, sco il co-organisatur dall’occurrenza Stefan M. Seydel ha detg: «Sco ils dus gronds altars laterals dalla baselgia claustrala ei era la Nossaduna da Mumpé Medel in’ovra digl entagliader Johann Ritz (1666 – 1729).» E perquei seigi la baselgia claustrala era in liug ideal per discutar in’eventuala restauraziun dalla sculptura.

Cu ed en tgei fuorma che la Nossadunna vegn restaurada, ei denton aunc buca clar. Per la squadra da project che cumpeglia sper Stefan M. Seydel era Flavio Murer e Tina Piazzi seigi gl’inscunter ina caschun da survegnir emprems resuns. Ei detti numnadamein pliras opziuns per dar nova veta alla sculptura, sco la restauratura Karolin Wirthner ha explicau.

Intervegnir dapli ni dameins

Aschia seigi ei pusseivel da mantener la sculptura cun intervenziuns minimalas. «Ins sa conservar quei ch’ei aunc avon mauns ni restaurar la sculptura, vul dir cumpletar leu nua ch’ei maunca zatgei», ha la restauratura detg. En quei cass fuss la Nossadunna da Mumpé Medel denton pli lunsch digl original. «Figuras da Ritz enconuschan ins immediat e questa Nossadunna ei cun fetg gronda probabilitad ina tala. Mo ins vesa era che bia ei buca pli original.» Ins savessi perquei era sanar la figura cumpletamein ni reconstruir ella tenor il model da Ritz.

Tier la Nossadunna dalla caplutta da s. Valentin fuss quei en emprema lingia ina damonda dallas colurs. «Figuras diltut doradas sco quella cheu ein fetg raras e pil pli il resultat da restauraziuns dils onns 1970», ha Karolin Wirthner declarau. Oriundamein seigien sculpturas da Nossadunna denton stadas coluradas. «Il vestgiu sez ei pil pli cotschens, il manti dadens blau e dado dad aur.»

Ina Nossadunna ambulonta

Da turnar tiel model da Ritz muntass denton buca mo da dar dapli colur alla Nossadunna. Sco la gruppa da project ha detg, sappien ins era ir in pass pli lunsch: «Ils donns dalla sculptura muossan ch’ella ei stada en funcziun sco Nossadunna ambulonta. Vul dir ch’ella ei vegnida purtada en loghens magari pli periferics per far messa ni oraziuns. Quei savess ins era puspei introducir.» En quei cass stuessi ins denton aschuntar ina trucca da schurmetg.

Tier ils participonts e participontas digl inscunter venderdis sera ei quella idea denton aunc fruntada sin pauca accoglientscha. La gronda part ei s’exprimida a favur d’ina restauraziun minimala culla finamira che la Nossadunna da Mumpé Medel resplendi puspei – e quei bein schurmegiada en sia caplutta.