Ina stad en chamona

Cura ch’ella leva a las 05.30 la damaun e guarda or da fanestra vesa ella ina colonna da glischs che sa mova tras il stgir vers il piz da la muntogna Weissmies. Igl è l’emprima gruppa da viandants e viandantas che parta per turas fitg alpinas e che ha gia ensulvì a las 04.00 la damaun. Ses servetsch da lavur cumenza oz cun preparar il segund ensolver da las 07.00.

Intgins capricorns la beneventan cura ch’ella passa pli tard giuadora per svidar il cumpost. Els èn savens ils emprims ch’ella inscuntra la damaun. Avant che turnar en chamona contempla ella la pizza – questa cuntrada è ses dachasa per questa stad. Ella cuntinuescha cun semtgar café e latg, lavar giu e scuar. «Jau hai puspè zuppà mes numer da telefonin – lain guardar, sche jau survegn ina resposta», scutina ina da sias collavuraturas durant lavar giu. Ella sto rir. Sch’in guid da muntogna la plascha, lura dat questa collavuratura regularmain cun ses contact a moda dascusa – sin in cedelin zuppà tranter las sugas da raiver u nudà davosvart sin il bon che tut ils guids e las guidas survegnan.

Sco proxim fa ella si ils letgs e schubregia las tualettas ed ils bogns. Qua fa ella mintgatant ina u l’autra interessanta scuverta. Nundumbraivlas soccas e chautschas suten vegnan laschadas enavos. Ier aveva ella remartgà ch’ina garnitura da letg d’in guid era sper il letg d’ina viandanta. «Uss èsi cler, pertge ch’in auter um aveva vulì midar chombra, perquai ch’i saja memia stretg en quella», aveva ella pensà surriend.

Suenter ina pausa hai num servir gentar e petta il suentermezdi. «Avais vus quadrels da glatsch?», dumonda in osp. «Per quels stuessas ir sin il glatscher», respunda ella en patratgs e scurlatta il chau. Intginas persunas han giavischs che na pon betg vegnir ademplids en ina chamona sin quella autezza – ed ellas dumondan per exempel, sch’i dettia duschas u sientamauns.

Quest suentermezdi arriva er in ami da dus alpinists che han gì in accident dacurt en la vischinanza da la chamona. El vegn per lur bagascha ch’è restada enavos. Dapi quest schabetg è ella fitg attenta al tun da helicopter. Quel arriva normalmain mintga venderdi cun mangiativas. Dad udir la ramur d’in helicopter in di ord norma n’è betg in bun segn. Igl era stà in curius sentiment dad udir la nova ch’ils dus raividers – als quals ella aveva anc servì la tschaina la saira avant – eran crudads blers meters en la profunditad il proxim di. Per cletg han omadus survivì.

Adina dapli glieud arriva vers saira. Ella fa il check-in e mussa las chombras. In viandant raquinta d’ina via stentusa che maina tar in lai. «Gea, là ston ins far attenziun ch’ins na rocla betg, navair?», di il guardiachamona e tschaghegna si per ella. Avant curt era ella viandada sin la medema via durant ses temp liber. Tut en patratgs era ella ruclada ed aveva sgrattà il mintun e la bratscha.

Tard la saira, suenter la tschaina, cura che tut è gia rugalà, cumparan duas glischs en il lontan. I sa tracta d’in viandant e d’ina viandanta che han sutvalità lur ruta. Spontan tschertga il persunal anc in letg, era sche la chamona è atgnamain gia plaina, e prepara ina schuppa.

Stancla va ella suenter a letg en sia chombra ch’ella parta cun trais autras collavuraturas. Sch’ella po, vul ella lavar damaun baud per ir a viandar sin il Zwischbergenpass e guardar la levada dal sulegl.

Laura Schütz studegia actualmain giurisprudenza a Friburg. Questa columna sa basa sin raquints da sia sora Nadia Schütz che lavura questa stad sin la Almagellerhütte en il Vallais.