Tragic accident da car cun morts e blessads

Tschintg persunas mortas e 40 blessadas. Quai è la bilantscha trista da l’accident cun in car dals Pajais Bass en l’Engiadina Bassa. Sco quai che la Polizia chantunala dal Grischun ha communitgà è l’accident stà chaschunà sez. L’accident è succedì gievgia enturn las 16.45 cura ch’il car ollandais era da viadi sin la Via d’Engiadina da Zernez en direcziun Susch. En l’areal d’in plazzal datiers da Less è il car collidà cun la saiv directiva a dretga, è vegnì giu da la via ed è cupitgà. Ina survista davart ils fatgs impurtants enconuschents e betg enconuschents.

Tgi era en il car?

Il car era da viadi cun 45 persunas creschidas. Tschintg èn mortas. 40 persunas èn vegnidas blessadas, da quellas trais grevamain, set ulteriuras mezgrevamain e 30 han blessuras levas. Quai ha scrit la Polizia chantunala dal Grischun il venderdi en ina communicaziun. Las tschintg barras n’èn anc betg identifitgadas formalmain. Sin dumonda da Keystone-SDA ha la Polizia chantunala ditg dumengia che quai pudess durar anc intgins dis.

La Polizia chantunala dal Grischun ha installà ina hotline per ils confamigliars da las persunas pertutgadas. Il Grischun stat en contact cun las autoritads da l’Ollanda.

Tge forzas da salvament eran en acziun?

Pliras forzas da salvament han manà las persunas blessadas en differents ospitals. En acziun eran set helicopters da la Rega, da l’Alpine Air Ambulance e da Heli Austria sco era 13 teams d’ambulanza. Sper las forzas da salvament medicinalas eran era pumpiers, l’agid stradal ed in care team al lieu. En pli eran collavuraturs da l’Uffizi federal da la duana e da la segirezza dals cunfins, da la medischina forensica e da l’Uffizi chantunal da construcziun bassa en acziun. Plinavant eran in servetsch da sepultura ed in servetsch da depannagi sco era commembers da l’uniun da samaritans al lieu da l’accident. La vischnanca Zernez ha organisà in center e nutriment per tut las persunas pertutgadas. Roman Rüegg, il pledader da medias da la Polizia chantunala dal Grischun, accentuescha envers RTR ch’il salvament al lieu haja funcziunà senza problems. Tuts hajan fatg il meglier pussaivel per las unfrendas.

Las lavurs da salvament dal car èn succedidas tenor Roman Rüegg venderdi da bun’ura. La via era serrada durant pliras uras. Gia il venderdi han ils lavurers sin il plazzal puspè cumenzà a lavurar.

Tge è la raschun per l’accident?

Davart la raschun exacta da l’accident na datti anc naginas indicaziuns cumprovadas. La Procura publica dal Grischun e la polizia chantunala examineschan il cas communablamain. Ellas sclereschan, pertge ch’il car è propi collidà cun la saiv directiva. I sto vegnir sclerì, pertge ch’il car è vegnì giu da la via cun traversar il plazzal e co precis che l’accident è succedì. Examinà vegn era, sch’il plazzal ha gì in’influenza sin l’accident. «Il plazzal è stà signalisà sco ch’in plazzal è signalisà. Quai metta tschertas pretensiuns, cunzunt per autos pli gronds», ha declerà Roman Rüegg, il pledader da medias da la polizia chantunala envers RTR. Pliras medias avevan rapportà ch’il manischunz haja stuì guntgir in crap. Quai n’ha confermà la polizia però betg. Ils indizis èn rimnads ed ins sto uss analisar la situaziun. Quai possa tenor il pledader durar in pèr emnas.

Tge è enconuschent davart il manischunz?

Sco che la polizia chantunala ha confirmà venderdi envers Keystone-SDA ha il manischunz dal car survivì l’accident. Er el haja gì blessuras. Davart ses stadi precis n’infurmeschan las autoritads però betg. Tenor retschertgas da la gasetta regiunala ollandaisa «De Gelderlander» sa tracti tar il chauffeur d’in politicher local da la provinza Gelderland. Quai ha la Somedia scrit sonda. El saja chauffeur da car en l’Europa. Sia dunna ha ditg envers la «NL Times» ch’el saja sa blessà en cumparegliaziun cun auters mo levamain, ma ch’el haja gronds donns psichics. El saja regularmain da viadi sin il traject ed enconuschia quel bain.

Nua sa chattan las persunas blessadas?

Sco che la polizia chantunala ha ditg sonda envers Keystone-SDA han las forzas da salvament manà las persunas blessadas en plirs ospitals, tant en il chantun Grischun sco er en divers ospitals dad auters chantuns. Tschertas persunas vegnan era tgiradas en ospitals da l’Austria. Per motivs da protecziun da las datas na vegni betg communitgà, en tge ospitals precis.

Tge èn las reacziuns naziunalas ed internaziunalas?

La regenza grischuna ha condolà venderdi ils confamigliars da las unfrendas e giavischà a las persunas blessadas ina guariziun speditiva. Ella engrazia era a tut las persunas participadas per lur grond engaschi. En il rom d’ina scuntrada cun il cusseglier federal Ignazio Cassis il venderdi a Soglio hai dà il suentermezdi ina minuta da silenzi.

il president da la Confederaziun Guy Parmelin ha scrit sin la plattafurma X ch’el saja profundamain schoccà e consternà da l’accident tragic en il Grischun. El condolescha a las famiglias da las persunas mortas ed empermetta che las circumstanzas da l’accident vegnian scleridas da radent ed engrazia a las numerusas forzas da salvament per l’engaschi. Era exprimì lur condolientscha han sin la plattafurma X il president dal Cussegl dals chantuns Stefan Engler ed il president dal Cussegl naziunal Pierre-André Page.

L’interpresa da car pertutgada dals Pajais Bass è era s’exprimida. Sin sia pagina d’internet scriva ella d’esser consternada e condolescha a las famiglias dals defuncts e da las defunctas. L’ambassadura dals Pajais Bass a Berna, Karin Mössenlechner, ha visità il venderdi persunas blessadas da la disgrazia. Da l’engaschi da las forzas da salvament è ella sa mussada fitg impressiunada. Natiralmain sajan las unfrendas da l’accident en il stadi da schoc, uschia l’ambassadura. La regenza ollandaisa è s’exprimida il venderdi da maniera schoccanta. Il primminister Rob Jetten ha scrit sin la plattafurma X d’ina disgrazia sgarschaivla en la Svizra e che ses patratgs sajan tar las unfrendas e lur confamigliars.

Era la vischnanca da Zernez ha exprimì a las persunas pertutgadas sia pli profunda cumpassiun e giavischa ad ellas blera forza en quest temp difficil. La glieud che ha lavurà sin il plazzal haja tenor il president communal da Zernez Domenic Toutsch gì ina fitg greva incumbensa. Tranter els eran giuvens pumpiers che duain ussa vegnir a frida cun ils purtrets da l’accident. Ils pumpiers da Zernez vegnian ils proxims dis a s’inscuntrar per elavurar las impressiuns dal salvament, ha declerà il president communal envers RTR.