Il plededer

Scha Stefan Metzger (guarda eir boxa) sto sü düraunt üna radunanza, alura aspetta als preschaints e las preschaintas pel solit üna zuffa u cuntaisa. Il schef da la fracziun dal Partieu populer svizzer (PPS) e commember dal Grand cussagl daspö l’an 2022 es cuntschaint per intervenziuns e pledoyers. L’advocat es alura cumplettamaing aint in sieu elemaint.

Stefan Metzger bivgnainta la FMR i’l büro d’advocatura a San Murezzan cun ögls glüschaints. L’adattamaint dal plan directiv es gnieu aderieu da la Regenza güsta quel di. «Il plan directiv es ün pass important per la colliaziun da l’Engiadina culla Bregaglia», disch l’advocat. El es superbi, perche cha que saja sto üna reacziun a sia intervenziun da l’an 2024 cha’l Chantun saja gnieu activ in chosa. Düraunt quels duos ans hegia el adüna darcho stuvieu dumander zieva tar la Regenza ed uossa finelmaing saja quist proget important per l’Engiadina gnieu ün pass inavaunt.

Dad intervenziuns e da respunsabilited

Stefan Metzger es daspö la fin da lügl il schef da la fracziun dal PPS i’l Grand cussagl ed ho clappo «üna bella carica nouva cun respunsabilited». In quista nouva funcziun ho el eir gieu sia prüma sessiun la fin dad avuost. Nouv in quista carica saja per l’advocat chi sto a Zuoz ch’el hegia uossa ün’incumbenza da direcziun, aunz saja el simplamaing be sto commember da la fracziun. Perque nun è’l neir na pü illa cumischiun da güstizia e sgürezza i’l Grand cussagl. «Eir ils oters 34 depütos e depütedas dessan clapper üna schanza da’s der aint.»

El hegia insomma eir auncha sieu mister. Eir scu schef da la fracziun hegia el tauntüna uossa da mner quella. Cha que vöglia dir: bgers barats cun singuls commembers chi preparan intervenziuns parlamentarias. «Que nun es da suotvalüter, ma da preparer intervenziuns es üna granda lavur – chi stu gnir fatta speratiers il mister, pel solit las sairas.» E cun que ch’el es advocat, metta el grand pais sün formulaziuns precisas. Uscheja declera il nouvelet schef da la fracziun la nouva sfida professiunela. Ch’el hegia grand’experienza in formuler e preparer intervenziuns e possa uscheja sustgnair bain sia fracziun.

Daspö l’an 2022 elet da la regiun

Experienza scu politiker ho Stefan Metzger daspö l’an 2022. A la dumanda, sch’el stöglia uossa der giò caricas in Engiadin’Ota pervi dal nouv post scu schef da fracziun managia el ch’el nu vöglia uossa cun sia nouva carica der giò otras e cha que nu fatscha neir na dabsögn. El es nempe persvas cha s’es elet scu vusch per üna regiun a Cuira. «I’l Grand cussagl as stu penser per tuot il chantun Grischun, ma s’es elet da la regiun.» Ch’el hegia bado cha p.ex. in Surselva sajan las dumandas per part las listessas scu in Engiadina – causa trafic u sgürezza «es que ün barat fich früttaivel» e na üna cuntradicziun. Scu advocat in Engiadin’Ota surpiglia el inavaunt mandats e lavura inavaunt vi dals existents, p.ex. es el giurist cumünel d’üna vschinauncha in Engiadina Bassa daspö passa 25 ans. E cha per mandats da si’egna chanzlia detta que adüna ün check dad interess ouravaunt.

Dal palc politic e da quel giuridic

Politica chantunela u cumünela, cò nun ho’l preferenzas. Ch’el nu saja in mincha cas na ün politiker da l’executiva, ma ün parlamentari e ch’el hegia scu giurist adüna lavuro scu cusglier u surpiglio caricas da controlla p.ex. in cussagls da fabrica u sindicatoris. Stefan Metzger managia cha las parallelas dal advocat cul schef da fracziun sajan «preschanter ün’opiniun ed ün interess». Que saja ün simil mecanissem, sch’el rapreschainta ün mandant in ün cas giuridic u sch’el inoltrescha dumandas tar la Regenza scu parlamentari. L’important saja da savair müder la perspectiva ed as metter illa pusiziun dal mandant. Stefan Metzger disch eir: «Scu advocat stögl eau minchataunt trer tres ün process intensiv, ma scha quel cas es alura evas, es que passo ed ünguotta persunel.» Forsa cha perque al gratagia uschè bain da müder chapè e carica? «Scu advocat s’ho da savair que, uschigliö s’es al fos lö.» Müder alura dad üna in l’otra carica saja simplamaing üna dumanda da credibilited. Ch’el nu possa piglier incunter mandats dad advocatura in quella vschinauncha ch’el saja mandato scu giurist.

Der botta per tschücha

Ün mandant es üna vschinauncha in Engiadina Bassa cun lingua ufficiela rumauntsch. «Eau incleg tuot, ma eau d’he üna blockeda da discuorrer, forsa perche ch’eau vögl fer memma bain», disch Stefan Metzger. El declera que uscheja: Cha’l rumauntsch in scrit saja tuot oter cu il tudas-ch in scrit ed impustüt texts giuridics e terms tecnics da dret – lo saja da fer attenziun. El disch ch’el hegia già guadagno ün cas davaunt güdisch perche cha üna «cunvenziun da separaziun» nun es il listess scu üna «cunvenziun da divorzi».

Il motor per el da fer – cuntschaintamaing bgeras – intervenziuns i’l Grand cussagl u da gnir a pled tar occurrenzas, da scriver chartas da lectuors u pusiziuns politicas es il seguaint: «Que am fo plaschair e que nun es do a minchün da discuorrer.» Ed alura güda sia professiun scu advocat chi piglia spraisa per la mandanta u pel mandant: «Que es mia natüra scu advocat: Eau pigl adüna spraisa pel debel.» El managia cha sch’el bada ad üna radunanza cha qualchün nun as ris-cha da dir qualchosa – alura güda el a quella u quel. Ma il motor principel per sieu ingaschamaint verbel saja ch’el ama la discussiun ed il barat da persuna a persuna.

Stefan Metzger as sapcha schont imaginer cha sieu talent da tegner pleds e la sveltezza da spiert possan intemmurir persunas da’s parteciper in discuors politics e da gnir a pled, p.ex. in radunanzas cumünelas. «A nun es però mia intenziun dad intemmurir quels chi staun salda, anzi: Eau vuless incurascher a minchün da s’exprimer, eau vögl dafatta sguozcher oura que.»

Direct e dischagreabel

Il slogan da las ultimas elecziuns pel Grand cussagl da Stefan Metzger d’eira «dischagreabel e direct». El disch cha quel slogan al plescha absolutamaing e cha, quel nu vuless el neir müder. Sch’el vuless rester uschè cumbattant? Lo corregia’l e disch ch’el vuless pütost rester provochant in sen positiv. Ch’el hegia «delizcha a debatter, vöglia per la discussiun e dad augmenter e tacter». Stefan Metzger disch: «Da me nu vegnan be quinto las pü bgeras intervenziuns i’l Grand cussagl, eau d’he eir clappo las pü bgeras risattas illas sessiuns.» Ad el esa eir important cha’s mantegna l’umur düraunt üna discussiun. Que saja sgür eir sto – speratiers sieu talent da gnir a tegner pleds – ün motiv perche ch’el saja gnieu tschernieu da sieu partieu scu delegio i’l parlamaint grischun.

La prosma intervenziun?

A la dumanda, che cha saja la prosma intervenziun i’l Grand cussagl, respuonda Stefan Metzger: «Eau d’he natürelmaing in giglioffa ün pêr tematicas.» Ma ch’in vista a la prosma sessiun d’utuon vuless el in prüma lingia sustgnair e güder als oters commembers da sia fracziun a scriver e formuler dumandas ed intervenziuns i’l Grand cussagl.

Pü cu facil oda u legia sgüra bainbod ün u l’otra da las lecturas u dals lectuors darcho da Stefan Metzger – forsa ad üna prosma radunanza u baderleda? El s’allegra sgüra, ma pront è’l in mincha cas per la prosma zuffa u cuntaisa.