Dapli pasta che zucher

«Il bass ei buc il zucher», di Rees Coray (45). «El ei la pasta.» Plaids specials per descriver in instrument. Il zucher ei dultschs. Mo la pasta ei la basa, e gest aschia vesa Rees Coray era il bass sco fundament d’ina band. 

In da tschels

Rees ha atgnamein num Andreas. Andreas stat sil pupi. Rees ei il num, sil qual el teidla. «Jeu sun buc in tip dominant», manegia el. Sch’el fa musica, va ei buc en emprema lingia per semussar. Ei va per passentar temps cun autra glieud. «Jeu sun in da tschels.» Ina sempla construcziun che declara sia capientscha da far musica. In bien bassist detti tegn ad ina band, di Rees Coray. El seigi il fundament, quel che meini tras la musica, buc exnum quel che tarlischi. La pasta halt.

Che siu num cumpara tier tontas differentas formaziuns, gruppas e collaboraziuns musicalas ei negina casualitad. Ei caztga el da seprofundar ella musica d’auters carstgauns. Quei seigi enzatgei fetg persunal.

Dar spazi

Ina sonda sera da settember seprofundescha Rees Coray ella musica dad Astrid Alexandre ella baselgia da Vuorz. Els presentan ensemen lur project «Resonanzas», cul qual els van sin turnea. Avon ch’el entscheiva a sunar, fruscha el ils mauns in vid l’auter. Ina gada, duas gadas, adina puspei. La detta sto vegnir caulda. Pér lu metta el ils mauns vid il cunterbass.

Sch’ins teidla co el suna, capesch’ins in tec meglier tgei ch’el manegia. Rees Coray teidla, spetga e reaghescha. Ses mauns meinan igl instrument, il tgau semova cun ed en sia fatscha semuossa mintga tun. El lai spazi senza svanir. Ei para sc’in sault.

Far musica persuls sappi esser enzatgei bi. Mo schar nescher enzatgei ensemen cun glieud ch’ins hagi bugen, seigi enzatgei auter. «La musica ei adina il resultat. Il far, igl esser el mument, ei quei che fascinescha mei.»

Semplamein cumprau in bass

Rees Coray crescha si a Laax «en ina famiglia normala», manegia el. «Sco quasi mintg’affon da lezzas uras, haiel era jeu empriu da sunar flauta.» A casa, mo era schiglioc, hagi el tedlau bia musica: Ray Charles, The Beatles, The Rolling Stones, mo era divers chors. Gest il cant da lezs hagi probablamein formau il pli fetg el.

Avon che Rees Coray ha priu plaz sin tribuna, ha el cunzun passentau temps sil glatsch. Ditg ei il hockey staus sia gronda pissiun. Lu ha in amitg detg in di, ch’el sappi tgei instrument che mondi a prau cun el: il bass. El ha buca studegiau duas gadas ed ha semplamein cumprau in. «Quei ei plitost stau ina decisiun naiva», di el oz. Forsa seigi el era staus alla tscherca ed aviarts per enzatgei niev.

Il paun da mintgadi

Cun empruar ora enzatgei niev ha el buca mo anflau ina nova pissiun, mobein gest sia professiun. Il 2016 ha el retschiert in premi dil cantun Grischun per siu project cul tetel «Viver per far musica, far musica per viver». Diesch onns pli tard constat quella construcziun aunc adina per el. Siu motto e project ei daventaus paun da mintgadi.

Rees Coray ha dus affons, instruescha oz ghitara, bass, cunterbass e stat per differents projects sin tribuna. Schegie ch’el suna differents instruments, eis ei clar per el: «Jeu ditgel buca ch’jeu seigi in ghitarist. Jeu sun in bassist.»

La musica seigi adina ida vinavon sur tut quels onns, «sc’ina barca che va cull’unda». El sappi viver da quei, ensemen cun dar scola. Perquei seigi el engrazieivels. La veta d’in musicist po magari fa ina pareta romantica. Mo alla fin dils quens ha era il bassist romontsch d’emplenir ora il cedel da taglia.

Cavar vinavon

El mira buca bugen anavos e sedamonda tgei ch’el vessi forsa saviu far meglier ni auter. «Jeu haiel adina priu quei ch’jeu haiel survegniu ed empruau da far il meglier ordlunder.» Zacu ha el realisau, ch’el hagi anflau enzatgei che fetschi plascher ad el.

Suenter pli che 20 onns musica dat ei negin «ussa saiel jeu ei». Anzi: «Sche ti fas aschi ditg musica ed has aunc adina marveglias, vul aunc adina saver dapli e cavar vinavon, lu has ti matei tuc la guota.» Sur la fatscha da Coray sestenda in surrir. Ruasseivel, sincer, cuntent. Carteivlamein drova ei buc adina zucher. Meinsvart tonscha ei da saver nua ch’ins sesenta bein. Per Rees Coray para quei liug d’esser la musica – ed ils carstgauns, culs quals el sa parter ella, sco quella sonda sera migeivla ella baselgia da Vuorz.